“Түйе – байлық, қой – мырзалық, жылқы – сәндік, ешкі – жеңілдік, сиыр – ақтық” деген халқымыз шаруаның бұл бес түріне диқаншылықты ес деп түсінген. Содан да болар, бүгінде егін шаруашылығымен айналысушылардың дені мал өсіруді де қолға алуда. Бұл қадамға мемлекеттің де көмегі түрткі болып отыр. Осы орайда Ғабит Мүсірепов атындағы ауданның “Біржан сал Степняк” ЖШС-нің бүгінгі тіршілігіне тоқталсақ.
Арайлым СМАҒҰЛОВА,
“Солтүстік Қазақстан”.
Осы күнге дейін егін шаруашылығымен түбегейлі айналысып, иелігіндегі 30 мың гектар жердің 22 мыңына бидай, арпа, майлы дәнді дақылдар сеуіп келген аталмыш ЖШС-тің директоры Айболат Ысқақов бізбен жайылымда кездесті.
– Егін шаруашылығымен бұрыннан айналысқандықтан, бұл бағыттағы жұмыстарымыз бір ізге түскен. Техника паркін үнемі жаңартып отырамыз. Өткен жылдары “Джон Дирдің” 3 себу кешенін және 5 комбайнын, екі “Essil КЗС-760” комбайнын сатып алдық. Ендігі жылы техника паркін тағы да жаңартуды жоспарлап отырмыз. Ал мал шаруашылығын 2010 жылдан бастап қолға алдық. Қазіргі таңда 241-дей қазақтың ақ бас сиыры бар. Алдағы уақытта аналық қара мал санын 500-ге жеткізуді көздеп отырмыз. Бүгінде мал шаруашылығымен айналысу тиімді. Мысалы, біз жуырда Қостанай облысының “Қырым” ЖШС-інен 50-ге жуық бас ірі қара әкелсек, мемлекет олардың әрбіріне 107 мың теңгеден субсидия төлеуде, – деген Айболат Бақытұлының айтуынша, қазақтың ақ бас сиырларының салмағы 400-500 килограмм. Сол себепті, алдағы уақытта шаруашылық бір килограмы 1500 теңге тұратын қара малды етке емес, репродуктор ретінде өткізуді жоспарлап отыр.
Ірі қарамен қатар Шопан ата түлігін де өсіруді қолға алған “Біржан сал Степняк” ЖШС-нің өрісінде 700 қой жайылып жүр. Еділбай қойының санын 1000-ға жеткізуді жоспарлап отырған серіктестік оларды Шығыс Қазақстан облысынан сатып алады. Жыл сайын ірі қараны да, ұсақ малды да 100-200 басқа көбейтіп жатқан шаруашылық Буденный ауылының жанындағы ескі мал қораларды қалпына келтіріп, түліктерінің көбеюіне жағдай жасауда.
– Қазір мал қораларды қысқы маусымға әзірлеудеміз. Малдың дін аман қыстап шығуы үшін мал қораның ішінде залалсыздандыру жұмыстарын жүргізіп жатырмыз. Түліктерді де үнемі бақылауда ұстап, қажетті шараларды жасаймыз. Осының арқасында ешқандай қауіпті ауруларға қатысты төтенше жағдайлар орын алған жоқ. Біз, әсіресе, бруцеллез, Сібір жарасына қатысты алдын алу шараларын тұрақты өткіземіз, – дейді ЖШС-тің мал дәрігері Алефтина Василенко.
Бүгінде 199 адам жұмыс істейтін “Біржан сал Степняк” ЖШС-і Буденное, Ефимовка ауылдарының әлеуметтік жағдайын жақсартуға атсалысуда. Тұрғындарға су тартып, жемшөппен қамтамасыз етіп, әлеуметтік нысандарға демеушілік жасайды.
Суретті түсірген
Амангелді БЕКМҰРАТОВ.