“Қарты бар үйдің – қазынасы бар” демекші, аға буынға деген құрметіміз ешқашан ортаймақ емес. Өмірде көргені көп, түйгені мол алдыңғы толқын өкілдері қоғамның темірқазығы іспетті. Талай қиындықты еңсеріп, егемен еліміздің дамуына сүбелі үлес қосқан асыл қазыналарымызға қандай құрмет көрсетсек те артық емес. Жалпы, біз қартын қадірлеген халықпыз. Сондықтан біздің қоғамда алдыңғы толқынға деген қамқорлық ерекше.
Бүгінде елімізде қарт адамдар мен мүмкіндігі шектеулі тұлғаларға құрмет жыл сайын артып, мемлекет тарапынан оларға көрсетілетін көмектің көлемі де ұлғайып келеді. Соңғы жылдары зейнетақы мен әлеуметтік төлемдер артып, қарт адамдар мен мүмкіндігі шектеулі жандарға қызмет көрсету түрлері кеңейтілді. Біздің өңірімізде 1995 жылдан бері аға ұрпақтың қоғамдағы рөлін көтеру мақсатында әлеуметтік қолдау айлығын өткізу дәстүрге айналды. Биыл облыста ұйымдастырылған қайырымдылық сенбілігіне 116 мыңнан астам адам қатысқанын айтып өткен жөн. Жергілікті билік өкілдері қарттарды назардан тыс қалдырған емес. Әсіресе, соғыс және еңбек ардагерлерімен кездесіп, қал-жағдайларын біліп тұрады. Еңбек ұжымдары, ардагерлер ұйымдары мен білім ошақтарында мерекелік концерттер ұйымдастырылып, қарттардың құрметіне дастарқан жайылады.
Өңірімізде бір ғасырлық мерейлі белеске жеткен адамдарға материалдық көмек беріліп, естелік сыйлықтар табыс етіледі. Ал ауылда тұратын қарттар мен мүмкіндігі шектеулі жандар үшін облыс орталығына экскурсия ұйымдастырылып, олар Қызылжар қаласының көрікті жерлерін тамашалау мүмкіндігіне ие болды. Тағдырдың жазуымен қарттар үйін паналауға мәжбүр болған жандарды әлеуметтік қорғау шаралары жүзеге асырылуда. Ұрпақ сабақтастығын жалғау мақсатында түрлі кездесулер өткізілді. Мұндай шаралар қарттардың көңілін көтеріп, жастардың санасына қозғау салады.
Үстіміздегі жылы емханаларда “Ашық есік күні” акциясы ұйымдастырылып, медициналық қызметкерлер көмек сұрай келген аға буын өкілдеріне тегін кеңес берді. Сондай-ақ, әлеуметтік дәріханаларда ардагерлер мен мүмкіндігі шектеулі жандар үшін қажетті дәрілер жеңілдікпен сатылды. Бұл орайда, алдыңғы толқынға тек мемлекеттік ұйымдар мен тиісті органдар ғана емес, қоғамның әр мүшесі қолдау көрсетуі тиіс екенін айтып өткен жөн. Өйткені, жасы үлкенді құрмет тұту, қарттың бүгілген беліне сүйеу болу – біздің ата дәстүріміз.
Ақсәулеш СЫЗДЫҚОВА,
облыстық жұмыспен қамтуды үйлестіру
және әлеуметтік бағдарламалар
басқармасының бас маманы.