«Рухани жаңғыру» бағдарламасы аясында жергілікті музей қызметкерлерінің арасында «Солтүстік Қазақстан облысы киелі жерлерінің картасы» тақырыбымен V облыстық экскурсия жүргізушілер байқауы өтті. «Абылай хан резиденциясы» мұражай кешенінде ұйымдастырылған іс-шара заманауи қоғам мәдениетіндегі музей ісінің мәртебесін, сондай-ақ, экскурсия жүргізушісінің рөлін арттыруға бағытталды.
Байқауға жалпы білім беретін мекемелердің тарихи-өлкетану, мемориалдық, ведомстволық музейлерінің 13 экскурсия жүргізушісі қатысты. Олар «СҚО киелі жерлері» онлайн журналы, белгілі топқа киелі нысан бойынша экскурсия жүргізу, «экспромт» кезеңінде эрудицияны, креативтілікті, тапқырлықты көрсету бойынша үш кезеңде бақтарын сынады. Шара барысында қатысушылардың назарына музейдің онлайн жұмыстары бойынша шеберлік сыныптары ұсынылды.
Қорытындысында бас жүлдені «Абылай хан резиденциясы» мұражай кешенінің экскурсия жүргізушісі Әлиасқар Нәбиев жеңіп алды. Жүлделі бірінші орынға «Тарихи-мәдени мұраны қорғау және пайдалану» орталығының қызметкері Жанат Баймусенов лайық деп танылса, екінші орынды Есіл және Айыртау аудандарының экскурсия жүргізушілері өзара бөлісті. Үшінші орын облыстық тарихи-өлкетану және М.Қозыбаев атындағы Солтүстік Қазақстан университеті музейлерінің экскурсия жүргізушілеріне бұйырды. Сонымен қатар Жамбыл ауданының экскурсия жүргізушісі Клара Кошаева «Өз ісіне адал» аталымымен марапатталды.
Людмила ШЕРАУХОВА,
«Абылай хан резиденциясы»
мұражай-кешенінің бас қор сақтаушысы.