«Қазақстан Республикасы колледждерінің ТОП-100 студенті» байқауының республикалық кезеңі өз мәресіне жетті. Үздік студенттердің қатарына жеті жерлесіміз енді. Осыған орай облыстық білім басқармасының басшысы Гүлмира Кәрімова жоба жеңімпаздарымен жүздесті. Петропавл құрылыс-экономикалық колледжінде өткен кездесуге білім ордаларының директорлары мен жұмыс берушілер қатысты.
Талантты жастарды қолдауға және жұмысшы мамандықтарын дәріптеуге бағытталған жоба үш кезең бойынша өтті. Алдымен колледжішілік, кейін өңірлік деңгейде ұйымдастырылып, республикалық кезеңге 338 жас іріктелінді. Онлайн дауыс берудің нәтижесінде үздік жүздіктің есімдері белгілі болды. Олардың басым бөлігі – «Web-дизайнер», «Дәнекерлеуші», «Техник-электроншы», «Супервайзер», «Құтқарушы», «Электр жабдықтарын монтаждаушы» және тағы да басқа мамандықтар бойынша білім алып жатқандар. Жобаның тиімділігі сол – жеңімпаздар өз мамандықтары бойынша кәсіпорын басшыларынан жұмысқа орналасуға шақырту алады.
Былтыр бұл байқаудың республикалық кезеңіне өңірімізден 14 студент қатысса, биыл олардың саны 24-ке жетті. Өткен жылы ТОП-100 студенттің қатарына – екі, биыл жеті жерлесіміз енді. Атап айтқанда, Қайсар Мусин, Аида Романқызы, Сәлима Бекмұрзаева, Дмитрий Заватский, Тимофей Романюк, Владимир Цимбал және Алина Малюга үздік жүздіктің сапынан көріне білді.
– Оқуда озат, қоғамдық өмірде белсенді студенттердің арасында студенттік қозғалыстардың көшбасшылары да бар. Биыл «Волонтер жылы» аясында олар әртүрлі акциялардың басы-қасынан табыла білді. Жалпы, елімізде жастарға арналған әртүрлі бағдарламалар жүзеге асырылып жатыр. «Жас маман» бағдарламасы аясында өңіріміздегі 4 колледждің материалдық-техникалық базасы нығайтылуда. Түлектерді ауылды жерлерге жұмысқа орналастыруды көздейтін «Дипломмен – ауылға!» бағдарламасы да сәтті жүзеге асырылуда. Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында жастар өз ісін ашуға мүмкіндік алуда, – деген Гүлмира Райынбекқызы студенттерді Тұңғыш Президент күнімен құттықтап, оқуда сәттілік тіледі.
Нұржан СЕЙІЛБЕКОВ,
«Soltústik Qazaqstan».
Суретті түсірген
Талғат ТӘНІБАЕВ.