ҮМІТ ПЕН КҮДІК

“Қарашаның суығы-ай, өкпе тескен” деп ақын жырлағандай,  терістіктен ызғырық жел соғатын қоңыр күз де келіп жетті. Нақ осы кезде біздің де көңілімізге үміт пен күдік қатар қонып, мазасыз күй кешетінімізді несіне жасырайық. Былайғы жұрт балапанын күзде санаса, біз “қараша, желтоқсан мен сол бір екі айда” оқырманымыздан көз жазып қалмасақ екен деп жанталасамыз. Оның үстіне газетіміздің ғасырлық тойы да жақындап қалды. Тарту-таралғымыз қандай болмақ? Өзімізді толғандыратын осы және басқа да сауалдардың жауабын оқырмандар ортасынан іздейтініміз анық. 

Мамлютка қаласындағы №1 мектеп-гимназияда бізді аудандық ішкі саясат бөлімінің басшысы Жанар Кәрімова қарсы алды. Қы­зылжар өңірінің өмірінен баспасөз арқылы хабардар болып отыратын аудан орталығының тұрғындары – ардагерлер, бәсекеге қабілетті, саналы ұрпақ тәрбиелеу жолында аянбай еңбектеніп жүрген аяулы ұстаздар, еліміз зор сенім артып, бо­лашағынан үлкен үміт күтіп отыр­ған жастар “Soltústik Qazaq­stan” газетінің ұжымы оқырмандарымен кездесу ұйымдастырады”, – дегенді естіп, осында жиналыпты.

“Қызылжар-Ақпарат” ЖШС-нің директоры Жарасбай Сүлейменов қазақтың асыл перзенттері іргесін қалаған басылымның тарихы жайлы сөз сабақтады. Алғаш жарық көргенінен бастап газеттің атауы бірнеше рет өзгергенімен, қаламгерлердің сан алуан буыны алға қойған мақсат-мұратынан айныған емес. Байырғы басы­лымның бодандықтың қамытынан құтылып, егемендікке қол жеткізген кезеңде елдің шын мәніндегі шежіресіне, ұйымдастырушы күші­не, тәлімді тәрбиешісіне айналға­ны сөзсіз. Бүгінгі таңда да басы­лым беттеріндегі тың тақырып, ұшқыр ой, танымдық және сарап­та­малық зерттеу мақалалары талғамы биік оқырманның жүре­гіне жол табуда.
Десек те, газеттің таралымына кері әсер етіп отырған жайттар да жоқ емес. Солардың ең бастысы – самарқаулық. Жастар түгіл, аға буынның өзі газет, кітап оқудан қа­лып барады. Осы жайттарға назар аударған газетіміздің тұрақты оқырмандарының бірі, ардагер Жұ­мабай Данияров оқымаған адам­ның ой-өрісі кеңеймейтінін айтты.
– Осы өңірдің тумалары Болат Сағындықов, Қымбат Исманова сияқты белгілі азаматтардың жан­айқайын естіп жүрміз. Жерлес қа­ламгерлер мен авторлардың ес­телік мақалаларын оқығанда көзі­мізге жас келіп, жүрегіміз елжі­рей­ді. Төл газетіміздің торқалы тойына тартуымыз болсын – алдағы жылы “Soltústik Qazaqstan”-ға жаппай жазылайық, – деді ол.
Ардагерді аудандық Мәдениет үйінің қызметкері Ерғали Зиябек те қолдады. Биылғы “Жастар жы­лында”, әсіресе, биік белестерді ба­ғындырып, түрлі додаларда өңі­ріміздің намысын абыроймен қор­ғап жүрген жалынды жастар жайлы мақалалар жиі жария­лана­тынын тілге тиек етті.
Шынымен де, “Soltústik Qazaq­stan” газетінің ұжымы бүгінгідей ақпараттық технология қарыштап дамыған заманда еліміздің асыл құн­дылықтарынан ажырап қалма­сақ екен деп шырылдап жүр емес пе?! Өйткені, газет – қай кезеңде де халықтың шын жанашыры. Жур­на­листердің зіл батпан еңбегі оқыр­мандар тарапынан бағаланып жатса, ол біз үшін үлкен абырой.
Таң нұрымен даланың
              жайнағанын сағындым.
Әнші құстар таң әнін
               сайра­ғанын сағындым.
Жазғы кеште тербеткен
               самалыңды сағындым.
Кеше ғана сенде өткен бала
                      күнді сағындым,– деп Фариза Оңғарсынова жырлағандай, ауыл жайлы әңгіме болғанда алаңсыз балалық шағы­мыздың куәсі болған алтын ұяның сұлу келбеті көзімізге елестейді. Тәрбие тал бесіктен бастау алады десек, сәмбі талдың иіліп тал бе­сікке айналар орны ауыл екені бе­сенеден белгілі. Ізеттілік, қайы­рым­дылық, мейірімділік, қонақ­жайлылық, имандылық секілді халықтың ерте заманнан қалыптас­қан игі дәстүрлері, барлық үлгі-өнегенің көрінісі ауылдан баста­лады. Демек, адами құндылықтар­дың негізі ауылдық тәрбиеде де­сек, қателеспейміз. Сүттей ұйып отырған Бексейіт ауылының тұрғын­дарымен кездесуге асығуы­мыз­дың себебі осы болса керек.
Қазақылықтың иісі аңқыған Бек­сейітте бүгінде жүзге жуық шаңы­рақ түтін түтетіп отыр. Кездесу ба­рысында емен-жарқын әңгімеле­сіп, ескі таныстардай өткен-кеткенді ой елегінен өткіздік. Ба­сылымның бүгінгі тыныс-тіршілігі, күн­де­лікті жұмысы жайлы әңгіме­леген Жарасбай Қабдоллаұлы Есіл ауда­нындағы Бұлақ ауылы бастап, Мағ­жан Жұмабаев ауда­нындағы Но­­ғай­­бай, Аққайың ауданындағы Да­йын­дық, Шал ақын ауданында­ғы Ке­ңес ауыл­дарының тұрғындары қол­даған “Әр шаңыраққа – “Sol­tústik Qa­zaq­stan!” үндеуіне үн қосушы­лар қата­рының қалыңдап келе жат­қанына ризашылық білдірді. Бұл игі үрдістен бексейіттіктер де ха­бар­дар екен. Олар қашанда ха­лықтың өті­ніш-тілектерін ескеріп, түрлі мә­се­­лелердің түйінін тарқа­ту­ға ықпал етіп жүрген басылым жай­лы жылы лебіздерін білдіріп, үн­деу­ді бір­ауыз­дан қолдап, мұнда­ғы әр отба­сы газетке жазылатынын жеткізді.
Меңгесер орта мектебі директо­рының тәрбие ісі жөніндегі орын­ба­сары Бибігүл Қайыржанова ұлт­тың мүддесі сыналған кезде қа­зақ баспасөзінің қашанда аянбай кү­рес жүргізгені жөнінде баянда­ды. “Экономи­кадағы оң өзгерістер, рухани құндылықтар сияқты алтын ар­қаулы мәселелердің бірде-бірі осы басылым назарынан тыс қал­ған емес. “Soltústik Qazaqstan” га­зеті – өткен ғасырдағы қазақ та­рихын, тұрмысын, мәдениетін баян ететін рухани жәдігер. “Қара­ша­­ңырақ” атанған басылым ұлт­тың ғасырлар бойы қалыптасқан өрке­ниеті мен мәдениетін таныту­ға қызмет етті”, – деген ол мектепте еңбектенетін мамандар, әсіресе, жастар басылымды қолдап, газет­ке жазылатындарын айтып сендір­ді. Шаруашылықтың қарамағында Бексейіт және Меңгесер ауылда­ры бар екенін айтқан “Мәмбетов және К” коммандиттік серіктесті­гінің ат­қа­рушы директоры Арыстан Жұ­ны­сов мерзімді баспасөзге жазылу кезінде газетке шама-шарқынша қол­дау көрсететіндерін жеткізді. Со­нымен қатар жиналған­дар ел игілігін көздейтіндіктен, газетте қазақ­тың тарихы, шығу тегі, ата-бабалары­мыз жайлы қызғы­лықты мақа­ла­ларды көбірек оқы­ғылары келе­ді екен.
Қазақылықтың қаймағы бұзыл­ма­ған Бостандық ауылы тұрғын­дарының газетімізге деген ықыла­сы, тіпті, ерекше екенін аңғардық. Ауылдағы орта мектептің дирек­торы Айгүл Сарбасова басылымға қатысты естеліктерімен бөлісіп, жастайынан ата-анасының айтуы­мен “Soltústik Qazaqstan” газетін қолынан түсірмегені жайлы әңгіме­леп берді.
– Тәуелсіздіктің елең-алаң жыл­дарында мектептерде оқу құрал­да­ры, кітап тапшы болғанда, бұқа­ра­­ның көзін ашып, көңілін ояту ісі­не газетте жарияланған мақала­лар септігін тигізді. Сол себептен егемендігіміздің нығаюына қос­қан үлесін айрықша атап өтуге бола­ды. Қарапайым жұмысшы болып еңбек ететін атам “Ленин туы” га­зе­тіне мақала жазып жүрді. Оларды топтастырып, жинайтыны да есім­де. Бертін келе жерлесіміз Нұрса­йын Шәріп осы басылымда ұзақ жылдар еңбек етіп, түрлі мәселе­лер­ді мақалаларына арқау етті. Ауылдастарының арасында сый-құрметке ие Өзбек Тастамбе­ков пен оның балалары Фархат пен Сан­жар да – га­зеттің тұрақты автор­лары. Сон­дық­тан біз “Soltústik Qazaqstan” газетін қашанда сүйіп оқимыз. Қо­ғамдағы, әсіресе, ауыл тұрғын­дарын тол­ған­дырып отырған мәсе­лелерді шешудегі шығар­машылық ұжым­ның еңбегі жоғары бағаға лайық, – деген Айгүл Ки­нуар­бек­қызы “Әр шаңыраққа – “Sol­tústik Qazaqstan!” бастамасын қос қолдап қолдай­тын­дарын айтты. Ал оқу ісінің мең­герушісі Гүл­жан Амантае­ва жарты емес, бір­ден бір жылға жазылаты­нын жет­кізді. Оның бұл сөзіне қосылғандар да аз емес.
“Серпін” мемлекеттік бағдар­ламасы бойынша М.Қозыбаев атындағы СҚУ-де қазақ тілі мен әдебиеті пәндерінің мұғалімі ма­мандығы бойынша білім алған Қызылорда өңірінің тумасы Гүл­жайна Пірімбетова екі жылдан бері жергілікті орта мектепте шәкірт тәрбиелеп жүр. Жас маман газет­тің мерейтойына орай жылы ле­бізін білдірді. “Жергілікті жерге қо­ныс аударғалы “Soltústik Qazaq­stan” газетінің тұрақты оқырма­нына айналдым. Осыған дейін жас маман ретінде өзімнің және мен жайлы жазылған мақалалар газет бетінде жарық көрген болатын. Ал өзім сабақ беріп отырған оқушы­лардың арасында шығармашы­лыққа бет бұрып, түрлі тақырып­тар­да қалам тербеп жүрген өрен­дер бар. Алдағы уақытта солардың қаламынан туған шығармашылық материалдарды газет бетіне жа­рия­лауға ұсынсам деймін”, – деген тілегін білдірді.
Осылайша, Мамлют ауданына іссапар барысында баспасөзге жазылу науқанында газет оқыр­ман­дарының қолдауын көре ал­маймыз ба деген күдігіміз сəл де болса сейіліп, басылымның ме­рей­лі белесі – 100 жылдық ме­рейтойдың алдында таралымы­мыз артады деген үміт оты мазда­ды. Ендігі ойымыз – үндеуді құптап, ауылдағы əр шаңырақ газетке жа­зылады деп сендірген азаматтар сөзінде тұрса екен дейміз.
 

Орынбасар ТӨЛЕПБЕРГЕНҚЫЗЫ,
“Soltústik Qazaqstan”.
СУРЕТТЕРДЕ: (солдан оңға қарай) Бостандық орта мектебі оқу ісінің меңгерушісі Гүлжан Амантаева, Мамлют аудандық Мәдениет үйінің қызметкері Ерғали Зиябек, Мамлют аудандық ішкі саясат бөлімінің қызметкері Ләззат Бегалинова және Бексейіт орта мектебіндегі кездесуден көрініс.
Суреттерді түсірген
Талғат ТӘНІБАЕВ.