Облыс мұғалімдері “Педагогикалық идеялар панорамасы” республикалық байқауында жүлдегерлер қатарынан көрінді.
Өңірдің педагогтары білім додасында қазылар алқасы назарына бейнесабақтар мен бейнедәрістер ұсынып, 12 аталым бойынша 10 жүлделі орынға ие болды. Оның 2-еуі алтын, 4-еуі күміс және 4-еуі қола медаль. “Денсаулық мәселелеріндегі сауаттылық” аталымы бойынша бірінші орынды ЛОРД дарынды балаларға мамандандырылған облыстық мектеп-лицей-интернатының мұғалімі Ольга Степанова алды. “Мәдениетаралық сауаттылық” аталымында №17 ұлттық өркендеу орта мектеп-кешенінінің директоры Ләззат Жалмұқанова топ жарды.
Екінші орынды “Айгөлек” балабақшасы, №5 орта мектеп, бірінші қалалық жалпы білім беретін IT-лицей мен “Дарын” мектеп-лицейінің қызметкерлері иеленді. Қола жүлде “Экологиялық сауаттылық” номинациясында Загдадовка орта мектебінің мұғалімі Алена Лосьқа, “Жаратылыстану сауаттылығы” аталымында Озерный орта мектебінің педагогы Марьям Шаймерденоваға және “Азаматтық-құқықтық-сауаттылық” аталымы бойынша Әбу Досмұхамбетов атындағы облыстық дарынды балаларға мамандандырылған гимназия-интернатының мұғалімі Дархан Қоспановқа бұйырды.
Аманжол ЗАҒЫПАР,
“Soltüstık Qazaqstan”.