С.Мұқанов атындағы қазақ-сазды драма театрында «Балқадиша» вокалды-фольклорлық халық ансамблінің «Ән – көңілдің ажары» атты ән кеші өтті. Талай жылдан бері өңір халқын өнерлерімен сусындатып жүрген ұжымды қолдай келгендердің қарасы қалың болып, залда ине шаншар жер қалмады.
«Балқадиша» вокалды-фольклорлық халық ансамблінің құрылғанына биыл 23 жыл толып отыр. Ансамбль құрамында 11 адам бар.
– Біз фольклорлық халық ансамблі болғандықтан халық композиторларының әндерін орындаймыз. Оның ішінде Ақан сері, Біржан сал, Естайдың әндері бар, сондай-ақ заманауи композиторлардың да шығармаларын шырқаймыз. Әнге деген құштарлықпен бір кездері басымыз қосылды, сондықтан әр репетициядан қалмаймыз, – дейді ансамбль әншісі Сәуле Тәжина.
Ансамбльді құттықтауға облыстық филармония ұжымы да арнайы келді. Өнерлі әжелер оркестрдің сүйемелдеуімен Ақан серінің «Балқадиша», «Қараторғай» және Біржан салдың «Бурылтай» әндерін орындады. Екі ұжым да бұл концертке дайындықты ерте бастаған екен.
Рабиға ЕРАЛЫ,
«Soltüstık Qazaqstan».