Облыс мектептерінің қаржыға жауапты мамандары сыбайлас жемқорлықтың салдарын көзбен көрді. Петропавл қаласындағы №50 әйелдерді түзету мекемесінде ерекше форматтағы профилактикалық экскурсия ұйымдастырылды. Оған облыстың жалпы білім беретін мектептерінің директорлары мен есепшілері қатысты.
Экскурсия барысында қатысушыларға мекеме ішіндегі тәртіп, сотталғандардың жазасын өтеу жағдайлары көрсетіліп, нақты сот тәжірибесінен мысалдар келтірілді. Сонымен қатар сыбайлас жемқорлық құқық бұзушылықтарының салдары кеңінен түсіндірілді.
Ұйымдастырушылардың айтуынша, бұл бастама білім беру саласында алдын алу шараларын күшейтіп, бюджет қаражатын басқаруға жауапты адамдар арасында заң талаптарын сақтау мен жеке жауапкершіліктің маңыздылығын терең ұғындыруға бағытталған. Іс-шараға қатысушылар экскурсиядан ерекше әсер алды. Бір ғана қателік, заңға қайшы әрекет бүкіл өмірге әсер етуі мүмкін екенін көзбен көріп, қызметтік міндетті адал атқарудың маңыздылығын ұғынды.
Ақерке ДӘУРЕНБЕКҚЫЗЫ,
«Soltüstık Qazaqstan».