Қызылжарлық «Sensitive» би театры Қытайда Шанхай ынтымақтастық ұйымының сахнасында өнер көрсетті.
Нақтырақ өнерпаздар Тянь-цзинь қаласында Шанхай ынтымақтастық ұйымы саммиті аясында ұйымдастырылған «ШЫҰ кездесуі – жүректің үні» атты халықаралық мәдени іс-шарада Қазақстанды таныстырды.
«Sensitive» би театры – Қазақстандағы есту қабілеті бұзылған әртістер өнер көрсететін жалғыз ансамбль. Қытай сахнасында бишілермен қатар ерекше балалардан құралған «Кішкентай дельфиндер» хоры да өнер көрсетті. Олардың қойылымдары көрермендерге ерекше рух сыйлап, өнерде шекара жоқ екенін дәлелдегендей әсерге бөледі.
Өңір басшысы Ғауез Нұрмұхамбетов теріскейлік өнер ұжымын Қытайда сәтті өнер көрсетуімен құттықтады.
«Өнерпаздардың жан-тәнімен орындаған әрбір қимылы – олардың жүрек тереңінен шыққан шынайы сезімнің, рух асқақтығы мен кәсіби шеберліктің жарқын көрінісі. Бұл шығармашылық серіктестік – мемлекеттер арасындағы достықты, мәдени өзара түсіністік пен сабақтастықты нығайтатын маңызды қадам. Өңіріміздің дарынды жастарының халықаралық деңгейде танылып, өнер арқылы жаңа серпін беруі – бүкіл қоғам үшін үлкен өнеге», – деді облыс әкімі.
Диас АЯҒАН,
«Soltüstık Qazaqstan».