Егемен еліміздің Ішкі әскеріне, басқа да қорғаныс саласына білікті мамандар даярлауға өзіндік үлес қосып келе жатқан оқу орындарының бірі – Петропавл Әскери институты. Отан қорғаушы күні қарсаңында аталмыш институт бастығының оқу және ғылыми жұмыстар жөніндегі орынбасары, ғылым кандидаты, полковник Марат Батыров-ты әңгімеге тартқан едік.
– Марат Ескенұлы, соңғы кезде әскери оқу орнында қандай өзгерістер болды?
– Өткен жылдың басында Петропавл Әскери институты Білім және ғылым министрлігінде мемлекеттік аттестаттаудан өтіп, білім беру қызметін жүзеге асыру құқығы лицензиясын алдағы бес жылға ұзартты. Сол жылы 15 наурызда Ресей, Беларусь, Украина ғалымдарының, Қазақстан Республикасы Ішкі істер министрлігі, Ұлттық Қауіпсіздік комитеті, Қорғаныс және Төтенше жағдайлар министрліктері оқу орындарының оқытушылары мен офицерлерінің қатысуымен “Қазақстан – 2050” Стратегиясын жүзеге асыру” тақырыбында халықаралық ғылыми-теориялық конференция өтті.
2013 жылы 28 тамызда Қорғаныс министрлігінің Алматы қаласындағы Әскери институтымен ынтымақтастық туралы меморандумға қол қойылды.
Институтымыздың курсанттары республика бойынша өткізілген түрлі шараларға қатысып, жүлделі орындарға қол жеткізді.
– Оқу орны ашылғаннан бері және 2013 жылы институтты қанша жас офицер бітіріп шықты?
– 2001 жылдан бері әскери оқу орны 2280 офицер әзірледі, оның 198-і оқу орнын үздік дипломмен бітірсе, 26 курсант “Әскери оқу орнын үздік бітіргені үшін” төсбелгісін алды. 2013 жылы 234 түлек лейтенант шенін алып шықты, оның 8-і – Қырғыз Республикасының, 10-ы – Тәжікстан Республикасының азаматтары.
Әскери институт Ішкі әскерге ғана емес, басқа күш құрылымдарына офицерлер әзірлейді. Қазіргі кезде оқу орнымыздың 180 түлегі Қорғаныс министрлігінің, Ұлттық қауіпсіздік комитетінің шекара қызметінің әскери бөлімдерінде, Республикалық гвардияның және Президент күзеті құрамында әскери қызмет атқарып жүр.
– Өткен жылы Петропавлдағы Әскери институтты Қырғызстан мен Тәжікстанның азаматтары да тамамдаған екен.
– 2009 жылдан бері Әскери институт 2007 жылғы 25 мамырдағы “ТМД-ға қатысушы мемлекеттердің ішкі істер органдары және Ішкі әскерлері үшін кадрлар әзірлеу жөніндегі келісім”, 2008 жылғы 27 маусымдағы Тәжікстан Республикасы мен Қырғыз Республикасы ІІМ Ішкі әскерлерінің әскери қызметкерлерін оқыту туралы келісімшарттар” негізінде Қырғызстан және Тәжікстан елдерінен курсанттар қабылдауды жүзеге асырып келеді.
2013 жылы 15 маусымда институтты 1-ші халықаралық түлектер бітіріп шықты.
Бұл салтанатты шараға ел Ішкі әскерінің Бас қолбасшысы, генерал-майор Р.Жақсылықов, Қырғызстан және Тәжікстан Ішкі әскерлері қолбасшыларының орынбасарлары қатысты.
– Марат Ескенұлы, әскери оқу орнында жүргізілетін ғылыми жұмыс туралы айтып берсеңіз?
– Институтта екі ғылыми мектеп пен екі ғылыми бағыт жұмыс істейді. Оқу орнында ғылыми әлеуетті көтеруге арналған жұмыс жүргізіледі: біздің офицерлер Phd докторантурасында оқиды. 2013 жылы Республикалық қоғамдық ұйымның “Петропавл қалалық Әскери ғылым академиясы” филиалы ашылды.
Жыл сайын наурыз айында Қазақстан мен шетелдің жетекші ғалымдарының қатысуымен халықаралық конференция өтеді, курсанттармен әскери-ғылыми жұмыс жүргізіледі. Біздің курсанттар “Үздік ғылыми жұмыс” байқауларына қатысып, жүлделі орындарға қол жеткізіп жүр.
– Офицерлердің біліктілігін арттыру факультеті жайлы да айта кетсеңіз?
– 2001 жылы 26 желтоқсанда Ішкі істер министрінің бұйрығымен Петропавл Жоғары әскери училищесінде ҚР ІІМ Ішкі әскері офицерлерінің біліктілігін арттыру және прапорщиктерді даярлау факультеті ашылды. Офицерлердің біліктілігін арттыру факультетінде Ішкі әскердің әскери қызметкерлері ғана емес, облыстық Ішкі істер департаменттері бөлімшелерінің, ТЖМ-нің, еңбекпен түзеу мекемелерінің (ЕТМ) офицерлері мен қызметкерлері де оқудан өтеді. Өткен жылы облыстық Ішкі істер департаменттерінің қарулану және киіммен қамтамасыз ету қызметінің 21 қызметкері, есеп беруге, сақтауға және артиллериялық-техникалық қару мүліктерін пайдалануға жауапты еңбекпен түзеу мекемелерінің 23 қызметкері курста болды.
– Институттың курсанттары өткен жылы қандай жетістіктерге қол жеткізді?
– Курсанттар облыстық деңгейде өтетін барлық мәдени және спорт шараларына белсене қатысады. Әскери қызметшілердің спартакиадасында Әскери институттың командасы – 3-ші, қысқы президенттік көпсайыста – 2-ші, шаңғы жарысынан 1-ші орын алды. Курсант Серік Мұқанов өткен жылы институттың үздік спортшысы атанды.
– Сөз соңында Әскери институттың даму болашағы туралы айта кетсеңіз?
– Елбасы биылғы “Қазақстан жолы – 2050: бір мақсат, бір мүдде, бір болашақ” Жолдауында еліміздің стратегиялық даму бағыттарын айқындап берді. Соған орай Әскери институттың 2014-2016 жылдарға арналған даму жоспары бар. Онда оқу орнының материалдық-техникалық базасын нығайтуға баса назар аударылған. Мәжіліс залы бар оқу корпусын, спорт кешенін, ату тирін, 100 пәтерлік тұрғын үй, шағын футбол алаңын салу жоспарланып отыр. Осының бәрі еліміздің қорғаныс саласына лайықты офицерлер әзірлеу үшін жасалмақ.
– Әңгімеңізге рахмет!
Сұхбаттасқан
Нұрсайын ШӘРІП,
“Солтүстік Қазақстан”.