Жер бетіндегі ең жедел көлік түрі – ұшақ. Әуе кемесі арқылы санаулы сағаттарда мыңдаған шақырымды бағындырып, қала мен қаланың, ел мен елдің арасын жалғауға болады. Көк аспандағы ақ бұлтты қанатымен қаққа жарып ұшатын алып ұшақтың әуеге көтерілуі мен қонуы үшін тұтас бір ұжым аянбай еңбек етеді. Мұнда бәрінен де жолаушылардың қауіпсіздігі маңызды. Сондықтан талап та қатаң. Бұл салада еңбек ететін мамандарға жүктелер міндет те ауыр. Оны әуежайдың өз ішінде жүргендер болмаса, былайғы жұрт біле бермейді.
Петропавл халықаралық әуежайы – өңірдегі жолаушылар ұшағы ұшып-қонатын жалғыз әуе тұрағы. Инвестициялық салым мен жаңғырту жұмыстарының арқасында бүгінде әуежай жұмысы бір жолға қойылып, ірі қалалар мен шет елдерге рейстер ашылған.
Кейіпкеріміз Арайлым Хамитова өзінің авиация саласына кездейсоқ келгенін айтады. «Тағдыр жолы мені осы салаға алып келді. Барлығы тәжірибеден басталды. Алғашқы қадамдарым ұшақтарды қарсы алып-шығарып салу, жолаушылармен жұмыс істеу, олардың ішінде шетелдік, іскер және VIP қонақтармен тіл табысу – осының бәрі менің шыңдалуыма ықпал етті. Уақыт өте келе менің басқарушылық және ұйымдастырушылық қабілеттерім көзге түсіп, басшылық маған сенім артты. Бүгінде мен бас директордың орынбасары әрі персоналды басқару бөлімінің басшысы ретінде үлкен жауапкершілікті арқалап жүрмін», – дейді Арайлым Ғабитқызы.
Білікті маманның айтуынша, бұл салада оқыған білімнен көрі кәсіби қасиеттер мен жинақтаған тәжірибе маңызды. Авиация саласында қызмет етемін деген адамның қолында диплом ғана емес, бойында еңбекқорлық, табандылық, жауапкершілік сияқты қасиеттер болуы тиіс.
Кейде кездейсоқ оқиғалардың өзі өмірімізге үлкен өзгерістер әкеліп, ертеңімізді өзгертуі мүмкін. Ал Арайлым Ғабитқызы мұндай кездейсоқтықтарды жай ғана сәйкестік емес, Құдайдың сыйы, тағдырдың көрсеткен жолы деп біледі. Бұған әуежай директорының түрік азаматы екенін білгенде тағы бір көзі жетті. Бұрыннан түрік тіліне қызығушылығы оянып, ерінбей оқып-үйренгені осындай сәтте кәдеге жарап, кәсіби қызмет барысында көп пайдасын тигізіп келеді. Сондықтан да маман жастарға мүмкіндігінше көп тіл үйреніп, ерінбей оқып-ізденуге кеңес береді. Бойға жиған білім мен қалыптасқан дағдының текке кетпей, ерте ме, кеш пе өз жемісін беретініне сенеді.
Көпшілік әуежай қызметкерлері тек ұшақтар қонып-ұшатын кезде ғана жұмыс істейді деп ойлауы мүмкін. Алайда мұндағы күйбең тірлік бір сәтке де басылмайды. Тіпті рейстер жоқ кездің өзінде мамандар алдағы жұмыстарды жоспарлап жатады.
«Әуежайда бір күн екіншісіне ұқсамайды. Таңертеңнен кешке дейін уақытпен жарысамыз десем артық емес. Таңертеңгі жиналыстан кейін күн тәртібіндегі барлық мәселелерді қарап шығамыз. Ұжымның жұмыс барысын бақылап, қызметкерлердің жағдайына, жұмыс тиімділігіне мән беремін. Ұшу кестесінің орындалуын, қызмет көрсетудің сапасын қадағалаймын. Бір мезет тыныш отыруға мүмкіндік болмайды. Көп жағдайда бар жұмыс күнім келіссөздер, құжаттармен жұмыс, кездесулер, түрлі жағдайларды үйлестірумен өтеді», – дейді Арайлым Ғабитқызы.
Әуежай ішіндегі өмір сырттағы әлемнен бөлек. Мұнда уақыттың да өлшемі өзгеше сияқты. Білікті қызметкерлердің бір минуты да текке кетпейді. Әуежай – мыңдаған адамның тағдыры тоғысатын үлкен торап. Ал олардың тағдырына Арайлым Хамитова сынды мамандар жауапты. Сондықтан бұл салада қателікке жол беруге әсте болмайды. Ұшақтың кешігуі, құжаттың дұрыс рәсімделмеуі барлық жолаушылардың жоспарына әсер етуі мүмкін. Сондықтан әр қызметкердің ұқыптылығы мен жауапкершілігіне баса мән беріледі.
Әуежайға келушілердің арасында ел азаматтары ғана емес, шетелдік меймандар да көп. Оларды лайықты қарсы алып, жолға аттандыру да оңай емес. Мамандар үшін тіл үйрену мен қарым-қатынас орната білу қабілеті осындайда қажет. Кейде бір ауыз жылы сөздің өзі келушінің көңілін көтеріп, қабағын жазуы мүмкін.
Әр күннің өз ерекшелігіне қарамастан мұндағы мамандардың есінде өмір бойы сақталып қалатын сәттер болады. Өңірге келетін белгілі адамдар мен мәртебелі меймандар ең алдымен әуежайға табан тірейді. Арайлым Хамитованың айтуынша, қадірлі қонақтардың келуіне орай мұнда ерекше дайындық жүргізіледі.
«Мен үшін ең есте қаларлық әрі ерекше жауапты сәттер – еліміздің Президентінен бастап жоғары лауазымды тұлғаларды, шетелдік қонақтарды немесе танымал жұлдыздарды қарсы алу мен шығарып салу рәсімдері. Бұл бізде бір реттік шара емес, тұрақты түрде ұйымдастырылатын жұмыс болғандықтан, әркез тыңғылықты дайындықты талап етеді. Ұшақ әуежайға қонғаннан бастап, VIP-залдағы жайлылықтан, ресми тұлғаларды қарсы алу тәртібіне дейінгі әрбір деталь алдын ала ойластырылып, ұсақ-түйегіне дейін қадағаланады. Мен мұндай шаралардың үйлесімді өтуін өзім ұйымдастырамын. Ұжымның әр бөлімін жұмылдырып, жұмысты бір бағытта басқару – үлкен жауапкершілік. Әріптестеріммен бірге барлық істің жоғары деңгейде атқарылуына күш саламыз. Мұндай жауапты сәттер – менің өмірімнің ең қызық әрі ұмытылмас бір бөлігі», – дейді кейіпкеріміз.
Келген жолаушының өңір туралы алғашқы көзқарасы әуежайда қалыптасады. Сондықтан әр маман келген жанға жылы шырай танытып, көмек қолын созып, қолайлы жағдай жасауы тиіс. Бұл ретте бір адамның қолынан келер іс аз. Әуежайдың толыққанды жұмысын ұжымның бірлігі мен ұйымшылдығы ғана сақтап қалады. Әр қызметкер үлкен машинаның бір бөлшегі сияқты. Сондықтан қызметкерлер үшін командада жұмыс істей білу маңызды. Қажет кезінде сабыр сақтап, әр іске мұқият болу Арайлым Ғабитқызының қанына сіңген әдет.
Бала кезінде жеті қат көкті бағындырып, ғарышқа ұшып, көкте самғап, ұшқыш, бортсерік болуды армандамаған жан жоқ шығар. Бүгінгі жастардың арасында да өмірін авиациямен байланыстырғысы келетіндер көп. Алайда кейіпкеріміз бұл мамандықты меңгеру оңайға соқпайтынын айтады. Ол үшін темірдей төзімділік танытып, көз алмай оқып, аянбай еңбектену керек. Әуежай қызметкері шет тілдерін, соның ішінде ағылшын тілін білу аталған мамандыққа қойылатын басты талап екенін айтады. Оған қоса физикалық, психологиялық төзімділік қажет. Елде ұшқыштарды Азаматтық авиация академиясы даярласа, бортсерік боламын дейтіндер әуе компанияларының арнайы оқу орталықтарында білім алады.
Білікті маманның өңірдегі әуежай туралы да айтары көп. Солтүстік Қазақстанның әуе қақпасы саналатын әуежай аймақты елорда және ірі қалалармен байланыстырып отыр. Жолаушылар ағыны да жылдан-жылға артып келеді. Бұрын тек ел аумағындағы рейстерге қызмет көрсететін әуежай енді халықаралық әуе қатынасын жолға қоймақ.
«Жазда Петропавлдан тікелей Египетке чартерлік рейстің ашылғаны – қала тұрғындары мен қонақтары үшін үлкен қуаныш болды. Бұл – біздің әуежайдың мүмкіндігінің кеңейгенін, жаңа деңгейге көтерілгенін білдіреді. Әуежай басшылығының басты мақсаты – қызмет сапасын арттыру, жаңа әуе бағыттарын ашу және халықаралық стандарттарға сай келетін инфрақұрылым қалыптастыру. Қазіргі таңда біз тағы да басқа халықаралық бағыттарды ашуды қолға алып жатырмыз. Бірқатар әуе компанияларымен келіссөздер жүргізілуде», – дейді Арайлым Хамитова.
Диас АЯҒАН,
«Soltüstık Qazaqstan».
Суретті түсірген
Шыңғысхан БЕКМҰРАТ.