Өңірге жұмыс сапарымен Президенттің кеңесшісі Мәлік Отарбаев келіп, облыс активімен кездесті. Алқалы басқосуда «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдаудың негізгі бағыттары талқыланды. Ондағы басты мақсат – берілген тапсырмаларды бұлжытпай орындау.
Жиынды ашқан облыс әкімі Ғауез Нұрмұхамбетов өңірдің экономикалық ахуалымен таныстырды. 200 мыңнан астам адам тұратын 600-ге жуық ауылдың 90 пайызына орталықтандырылған су құбырлары тартылған. Тұрғындардың өмір сүру сапасын жақсарту бағытында ауқымды жұмыстар атқарылуда. Тұрғын үйлер бой көтеріп, мектептер, медициналық және спорттық нысандар пайдалануға берілуде. Агроөнеркәсіпке заманауи технологиялар белсенді түрде енгізілуде. Бұл қадамдар ауыл шаруашылығының даму қарқынын арттырып қана қоймай, жаңа жұмыс орындарын көптеп ашуға да айтарлықтай ықпалын тигізіп отыр. Жыл басынан бері 1100 шақырым жол қалпына келтірілді. «Кең дала-2» бағдарламасы бойынша шаруаларға 105 млрд. теңге мөлшерінде жеңілдікті несие бөлініп, көктемгі, күзгі дала жұмыстары кедергісіз ұйымдастырылды. Жұмыссыздық деңгейі 4 пайызға дейін төмендеді.
– Мемлекет басшысы инфрақұрылымды дамыту және агроөнеркәсіптік кешенге заманауи технологияларды енгізу экономиканың тұрақты өсімі мен азаматтардың өмір сүру сапасын арттырудың негізгі факторларының бірі болып табылатынын айрықша атап көрсетті, – деді өз сөзінде Ғауез Торсанұлы.
Мағжан Жұмабаев ауданының әкімі Рахат Смағұлов инвестиция тарту бағытында жүзеге асырылып жатқан іс-шаралар туралы баяндады. Ірі тауарлы-сүт фермасын тұрғызуға 8 млрд. теңге қарастырылған. Осындай кешенді «Булаево жер» серіктестігі де салып жатыр. Өндіріс орындары қолданысқа берілген кезде 110 адам тұрақты жұмыспен қамтылмақ. «Қарақоға» шекаралық өткізу бекеті келесі жылы жаңғыртылып, электрондық кезек жүйесі енгізілетін болады.
Есіл ауданы Николаев ауылдық округінің әкімі Далабай Қабдуалиев елді мекендерде заманауи техникалармен жабдықталған 15 агроқұрылым, 19 жеке кәсіпкерлік орналасқанын, шағын және орта бизнес субъектілеріне жан-жақты қолдау көрсетіліп отырғанын жеткізді. Соңғы екі жылда 100-ге жуық тұрғын жұмыспен қамтамасыз етілген.
Президенттің кеңесшісі өңірдің даму қарқынын оң бағалады. Жолдаудың маңызды бағыттарын түсіндіре отырып, оның ішінде жасанды интеллектінің көмегімен көптеген өзекті проблемаларды шешуге болатынына тоқталды.
Облыс әкімінің баспасөз қызметі.