Soltüstık Казахстан
Президент Нұрсұлтан Назарбаев Қазақстанның үздік педагогтері форумында барлық педагогтерді Мұғалім күнімен құттықтады.
Құрметті форумға қатысушылар!
Сіздерді және Сіздер арқылы Қазақстанның барша педагогтерін кәсіби мерекелеріңізбен – Мұғалім күнімен шын жүректен құттықтаймын!
Сіздер күнделікті тынымсыз еңбектеріңізбен миллиондаған отандастарымызды дүниені тану үдерісіне тартасыздар, жоғары білімді, адамгершілігі мол және патриот азаматтарды тәрбиелеп, олардың кәсіби тұрғыдан қалыптасуына жол ашасыздар. Демек, ел болашағының іргетасын Сіздер қалайсыздар.
ХХІ ғасырға сай ұрпақ тәрбиелеу – ерекше құрметке лайық іс, ол аса зор жауапкершілік пен ерен еңбекті қажет етеді.
Елімізде білім беру саласының материалдық-техникалық, әдістемелік базасын жаңғырту, білікті педагогикалық кадрларды көбейту және оларға қолдау көрсету бойынша жүйелі жұмыс жүргізілуде.
Қай заманда болсын мұғалім адамгершілікті, мәдениетті жеткізуші, өз ісіне адалдықтың үлгісі болған.
Мұғалім жүрегіндегі мейірімділік пен даналық ешқашан сарқылмасын, өз кәсібіне адалдық оты сөнбесін!
Сіздердің игілікті еңбектеріңізге сәттілік тілеймін!
Нұрсұлтан НАЗАРБАЕВ,
Қазақстан Республикасының Президенті.