Soltüstık Казахстан
Н.Погодин атындағы облыстық орыс драма театрында “International Gala” концерті өтті. Литва, АҚШ, Ресей елдерінен келген үлкен сахнаның кәсіби классикалық музыка әртістері қызылжарлықтарға өнер көрсетті.
Бақытжан ЖОЛДАСҚЫЗЫ,
“Солтүстік Қазақстан”.
К.Байсейітова атындағы опера және балет театрының бас дирижері Абзал Мухитдиновтың қолдауымен өңірімізге табан тіреген классикалық музыка әртістерінің ішінде Үлкен театр (Мәскеу) труппасының белді опера әншісі, көптеген халықаралық байқаулардың лауреаты, Грузияның халық әртісі Отар Кунчилиа болды. Ол Моцарттың “Дон Жуан”, Россинидің “Севиль шаштаразы”, Рахманиновтың “Алеко” операларынан үзінділер орындады. Оның әртістік шеберлігінің арқасында тыңдаушылар толықтай операның мән-мағынасын ұғына алды. Ұлы композиторлардың операларынан үзінділерді өңірлік концерттік-симфониялық оркестр (дирижері Сергей Имашбаев) сүйемелдеді.
Концертте сонымен қатар Литва елінен келген Вильнюс хоры эстон, бразилия, литва халықтарының ұлттық композицияларын орындады. Лос-Анжелес қаласынан келген Лиана Степанян (сопрано) мен Анжела Чоланян өнер көрсетті. Әлем классикасы туындыларымен қатар концертте Абайдың “Айттым сәлем, Қаламқас” пен Брусиловскийдің “Айман-Шолпан” композициялары орындалды.
Суреттерді түсірген
Талғат ТӘНІБАЕВ.