Soltüstık Казахстан
Облыстық төтенше жағдайлар жөніндегі департаментте өткен баспасөз мәслихатында кезектен тыс аттестаттаудың қорытындысы жарияланды.
Гүлбике ТӨЛЕБАЕВА,
“Солтүстік Қазақстан”.
Жоғары аттестаттау комиссиясында 1 маман сыннан өтіп, лауазымына сәйкес деп танылған. Орталық аттестаттау комиссиясы өртке қарсы қызметте еңбек ететін 22 тұлғаның біліктілігін байқаған. Нәтижесінде 4 қызметкер кадрлық резервке енгізіліп, жоғары лауазымға ұсынылды. Үшеуінің қызметі төмендетілетін болды. Бір адам жұмысынан босатылды. Ал өңірлік аттестаттау сынынан 812 қызметкер өткен. Соның 243-і орта және аға басқарушы құрамнан. 569-ы – қатардағы қызметкерлер. 36 мемлекеттік қызметші аттестаттаудан өтуден бас тартып, жұмыстан өз еркімен кеткен. Екеуі сырқат болуына байланысты сынақтан босатылды. СҚО ТЖД кадр жұмысы бөлімінің бастығы Серік Дүйсембековтің хабарлағанындай, 2 қазан-12 қараша аралығында өңірлік аттестаттау комиссиясының әңгімелесу жүргізу бойынша 14 отырысы өтіп, нәтижесінде 769 қызметкердің ішінен 43-і кадрлық резервке енгізілген. Олардың лауазымдары өсетін болды. 668-і біліктіліктерін ақтап шығып, лауазымдарына сәйкес деп танылды. Ал 15-інің лауазымы төмендетілсе, 7 маман басқа қызметтерге ауыстырылды. 34-і сыннан өте алмай, қызметтерімен қоштасты. Бұлардың ішінде 15 адам – басшылық құрамда еңбек еткендер. 2 қызметкердің лауазымға сәйкестігі арнайы комиссия шешімінен соң белгілі болады.
Баспасөз мәслихаты барысында өрт қауіпсіздігін қамтамасыз ету бойынша өткен он айдағы жұмыс қорытындысы мен қысқа әзірлік барысы туралы баяндама жасалды.