Soltüstık Казахстан
Шыңғысхан СЕРҒАЗИНОВ,
№17 ұлттық өркендеу орта
мектеп-кешенінің 2-сынып оқушысы.
Ерте, ерте, ертеде үлкен, әдемі, ғажайып, керемет “Сәбилер әлемі” аталатын қала болыпты. Сол қалада көптеген ақылды, сауатты, білгіш, өнерпаз, еңбексүйгіш, адамгершілігі көп, бір-біріне көмектесуге дайын балалар тұрыпты. Олар суықтан, аяздан, ыстықтан, оттан, судан қорықпайды, ешкімнен жеңілмейді екен. Бәрі де күн шуағын, күннің көзін зерттеумен айналысыпты. Оқу бітіріп, жан-жаққа жұмысқа кетіпті. Күндердің күнінде патша жан-жаққа хабарлама жіберіпті: “Наурыз айының 21-і күні ғаламшарлар шеруі өтеді. Кездесуге шақырамын, көптеген сыйлықтар болады”. Бұл хабарламаны естіп көп халық және “Сәбилер әлемі” қаласында оқығандар жиналады.
Ең бірінші сөзді ұзын бойлы жігіт бастайды: “Мен балалық кезімнен ғаламшарларды зерттеймін. Бүгінгі күні мен Күннің көзінен 778 млн. шақырым жерде орналастым. Ешкімге жамандық жасауға жол бермеймін”, – деп сөзін аяқтайды. Патша оны тыңдап: “Сен дәу және ақылды екенсің, сенің атың Юпитер болады”, дейді. Екінші алыстан келген жігіт сөйлейді: “Мен де балалық кезімнен ғаламшарларды зерттеймін. Бүгінгі күні мен Күннің көзінен 1,4 млрд. шақырым жерде орналастым. Бәрін сауатты, білімді болуға шақырамын”, деп сөзін аяқтайды. Патша оны тыңдап: “Сен барлық әлемнің болашағын ойлайсың, сенің атың Сатурн болады” дейді. Патша басқа жиналғандарға да Меркурий, Жер, Марс, Уран, Плутон, Венера, Нептун деп ат қояды. Осылайша, наурыз айының 21-і күні тартымды, қызықты, тамаша ғаламшарлар шеруі өтті. Мен де сол шеруге қатыстым, менің есіміммен болашақта бір ғаламшар аталатын болды деп ойладым, себебі, мен есейгенде ғарышты, ғаламшарларды зерттегім келеді.