Soltüstık Казахстан
Мамлют аудандық ішкі істер бөліміне Мамлютка қаласының тұрғыны 15 жастағы баласының ұялы телефонын белгісіз біреудің ұрлағаны жөнінде арызданды. Шығыны – 27 мың теңге. Полицейлер баладан мән-жайды сұрағаннан кейін мектептен үйіне қайтар жолда оған бұрыннан таныс жасы үлкен жігіттің жолыққандығын анықтады.
Ол алдымен баладан телефонды қоңырау шалу үшін сұрап алса, артынан әуен тыңдаймын деп сылтауратқан. Нәтижесінде телефон иесінің қасында келе жатқан қатарластарымен әңгімесі қызған кезде жігіт өз жөніне кетіп отырған.
Жігіт өз үйінде ұсталды. Бұрын да әкімшілік құқық бұзушылық және ұрлық үшін жауапкершілікке тартылған Мамлютка қаласының 24 жастағы тұрғыны полицейлерді көрген кезде өзінің телефонды алып кеткенін теріске шығармады. Нәтижесінде оның үйінен ұрланған “Nokia” телефоны тәркіленіп, иесіне қайтарылды.
Аталмыш факті бойынша ҚР ҚК-нің 175-бабы “Тонау” бойынша қылмыстық іс қозғалды. Іс жеңілдетілген тәртіпте сотқа дейін аяқталатын болады.
Облыстық ІІД-нің баспасөз қызметі.