Soltüstık Казахстан
Облыстық Қорғаныс істері жөніндегі департаментте Қазақстан Республикасы Қарулы Күштері қатарына әскерге шақырылушыларды салтанатты түрде шығарып салу шарасы өткізілді.
Еркінбек БАЙБОЛОВ,
облыстық Қорғаныс істері жөніндегі департаменттің бастығы.
Отан алдындағы борыштарын өтеуге аттандырылатын азаматтарды шығарып салу рәсіміне облыстық Қарулы Күштер ардагерлері кеңесінің төрағасы Борис Сапенков, интернационалист-жауынгерлер, әскерге шақырылушылардың ата-аналары мен туысқандары қатысты.
Жиынымыз Қазақстан Республикасының Мемлекеттік Туын салтанатты шығару мен Гимнді орындаудан басталды.
Борис Сапенков пен Ауған соғысына қатысқан интернационалист-жауынгер Николай Белогуб әскери қызметтің қиындықтары мен қызығы мол болатындығын, жас сарбаздарға жүктелетін үміт пен сенім туралы өз ойларымен бөлісті. Жиында қызылжарлық жас жігіттер азаматтық борышын өтейтін әскери бөлімнің өкілі Бағлан Қалдықараев болашақ сарбаздарға тілек айтып, олардың ата-аналарына, Қорғаныс істері жөніндегі департамент басшылығына ризашылығын білдірді.
Мерзімді әскери қызметін өтеп, еліне оралған Шыңғыс Сүлейменов болашақ Отан қорғаушылармен әскери қызмет туралы өз пікірімен, ақыл-кеңесімен бөлісті.
Жас сарбаздар атынан Басыбай Азамат шығып, әскери қызметті елі, ата-аналары мақтаныш ететіндей өтеуге, болашақта Қазақстан Республикасының әлемдегі алдыңғы қатарлы елдер арасында болуына өз үлестерін қосатындықтарын айтты.
Мерекелік іс-шара барысында Петропавл қалалық Мәдениет үйінің, облыстық филармонияның әртістері мен “Арай” би ансамблінің бишілері өнерлерімен жиналған қауымды тәнті етті.