Soltüstık Казахстан
Қошан ҚАЛИ,
“Солтүстік Қазақстан”.
Тәуелсіздік күнгі қуанышты сәттердің бірі “Қазпочта” акционерлік қоғамы облыстық филиалына қатысты болды. Мереке қарсаңында аталған филиалдың құрылымдық бөлімшелеріне 18 “УАЗ” автокөлігі берілді. Айыртау, Ақжар, Есіл, Жамбыл, Мағжан Жұмабаев, Ғ. Мүсірепов атындағы, Тайынша, Тимирязев, Қызылжар, Шал ақын аудандық пошта байланысы тораптарының басшыларына жаңа көліктердің кілтін облыс әкімі Самат Ескендіров тапсырды.
Самат Сапарбекұлы салтанатты шара барысында пошта байланысы қызметінің еңбеккерлерін айтулы мерекемен құттықтап, табыс тіледі. Үстіміздегі жылдың өткен 10 айының қорытындысы бойынша “Қазпочта” АҚ СҚО-ның жиынтық табысы 2012 жылмен салыстырғанда 7 пайызға артқан. Сөйтіп жалпы табыс көлемі 2,5 миллион теңгеге ұлғайтқан филиал бұл күндері өз қызметімен облысымыздың 600-ден астам елдімекенін қамтиды. Пошта тасымалдау 24 мың шақырымды құрайтын 100-ден аса бағыт бойынша жүзеге асырылады.
Осы күні балабақшаға лайықтап қайтадан жобалаудан өткен, қаламыздың Айыртау көшесіндегі, №6 үйде орналасқан, кезінде Солтүстік Қазақстан “Сана” колледжі болып жұмыс істеген екіқабатты ғимарат пайдалануға берілді. Ол – енді “Алпамыс” балабақшасы. Ондағы құрылатын 4 топқа 64 бүлдіршін барады. Олар қазақ тілінде тәрбиеленетін болады.