Soltüstık Казахстан
Облыс орталығында өңір велошабандоздарының өткен маусымдағы жетістіктері қорытындыланды. Шара барысында үздіктер қатарынан көрінгендерге ақшалай сыйлықтар табыс етілді.
Қанат АТАМАНОВ,
“Солтүстік Қазақстан”.
Жас спортшыларды велосипед спорты бойынша аға жаттықтырушы-оқытушы, веложарыстан спорт шебері, Александр Винокуров атындағы “KYZYLZHAR VINO 4-ever” құрлықтық велоклубының директоры, ҚР еңбек сіңірген бапкері Сергей Кручина құттықтады.
Солтүстікқазақстандық велошабандоздардың ел көлемінде және әлемдік деңгейде өткен чемпионаттар мен жарыстарда қарсылас құрамаларға жоғары бәсекелестік көрсете білгендігін, өңір құрамасы сапында нағыз болашақ жеңімпаздардың шыңдалып келе жатқандығын тілге тиек еткен Сергей Иванович әртүрлі жарыстарда облыстың намысын абыроймен қорғай білген 38 спортшыға ақшалай сыйлық табыстады.
Сонымен қатар жыл бойы ұйымдастырылған “Рейтинг – 2013” сайысының жеңімпаздары атанған Александр Овсянников, Сергей Мальцев және Илья Кочетковтарға кәсіби велошабандоздардың формалары табыс етілді.
Шара соңында Сергей Кручина жас спортшыларға республикалық және халықаралық чемпионаттарда, сондай-ақ әлем біріншіліктерінде республика намысын қорғап жүрген “Astana Continental Team” командасының “Андерлер” санатындағы мүшелері – Жандос Бижігітов, Төлеген Майдос, Виктор Окишев және Бахтияр Қожатаевтың жеңістерін үлгі етті.
Қазіргі уақытта велоспортшылар Доминикан елінде ақпан айында өткізілетін жарысқа қызу дайындық үстінде.
Суретті түсірген Талғат ТӘНІБАЕВ.