Soltüstık Казахстан
Аудан мектептерінде оқушыларға білім нәрін сеуіп, мектептің жүрегі болып жүрген ұлағатты ұстаздар жетерлік. Оларды оқушылар да, ата-аналар да, қоғам да мақтан тұтады. Сондай ұстаздардың қатарында өз ісінің маманы, білім саласында 20 жылдан астам үздіксіз қызмет атқарып келе жатқан тәжірибелі ұстаз №2 Ленинград орта мектебінің психологі Разиха Жақанова да бар.
Талай рет аудандық Білім бөлімінің “Білім беру саласында жетістіктері үшін” марапатына, “Жыл педагог-психологі” облыстық байқауында 1-ші дәрежелі дипломға, республикалық “Ең үздік психолог” байқауының қатысушысы сертификатына ие болған Разиха Карбайқызының республикалық конкурстан кейін жұмыстары үздік деп танылып, ғылыми-практикалық әдістемелік “Мектептегі психология – Психология в школе” журналында бірнеше жұмысы жарық көрді. Сәуір айында ол озат тәжірибесімен алмасу мақсатында облыстық және аудандық психологтардың қатысуымен №2 Ленинград орта мектебінде “Ғажайып жұлдыздар әлемі” атты семинар өткізді. Өз тәжірибесіндегі жұмыстарын шағын кітапшалар үлгісінде шығарып, келген психологтарға таратты.
Тәжірибелі ұстаз мектеп ішіндегі қоғамдық жұмыстардан да тыс қалған емес. Отбасы күніне орай алдыңғы қатарлы мұғалім мектепте оқушылармен және ата-аналармен бірге “Ата-ана махаббаты” атты семинар-тренинг өткізді. Сол сияқты ұстаздар мерекесі қарсаңында “Ұстаз деген – ұлылардың ұлысы” атты мереке ұйымдастырды. Қазан айында мектепте психологиялық апталық ұйымдастырылып, ұстаздарға, оқушыларға және ата-аналарға арналған қызықты сауалнамалар, жасөспірім мен ата-ананың қарым-қатынасын психологиялық тұрғыдан талдау барысында “Сонымен, солай дейік…” атты қызықты бағдарламалар да нәтижелі өтті.
Терең білімі, оқу-тәрбие жұмыстарындағы мол тәжірибесімен әр оқушының жүрегінен орын тапқан оқытушыны мектептің жас мамандары үнемі үлгі тұтады.
Болат МҰҚАШЕВ,
аудандық Білім бөлімінің әдіскері.
Ақжар ауданы.