Soltüstık Казахстан
Ғ. Мүсірепов атындағы ауданның Новоишим қазақ орта мектебінде бастауыш сыныптарға сабақ беретін Бибігүл Уәлиеваның еңбек өтілі – 20 жыл. Мағжан Жұмабаев атындағы Петропавл гуманитарлық колледжін, Шоқан Уәлиханов атындағы Көкшетау мемлекеттік университетін бастауыш сынып оқушыларын оқыту әдістемесі мамандығы бойынша бітірген. Еңбек жолын Шал ақын ауданының Еңбек ауылындағы негізгі мектепте бастаған.
Бибигүл Уәлиева бірінші санатқа тестілеуден өтіп, “Шығармашылық-іскерлік” атты әдістемелік кітапшасын шығарған. Онда бастауыш сынып балаларының ой-өрісін дамыту үшін логикалық есептер мен санамақтарды қалай пайдалануға болатындығы туралы тәжірибесімен бөліседі. “Өрлеу” біліктілікті арттыру ұлттық орталығы” АҚ-ның СҚО ПҚБАИ филиалында үшайлық курсты тамамдап, сертификат алған. Қазір сондағы алған теориялық білімін тәжірибе барысында іске асыруда.
– Балаларды бастауыш сыныптардан бастап қоршаған ортаны бақылауға, білімқұмарлыққа, ізденімпаздыққа, байқампаздыққа баулимын. Оқушыларым олимпиадаларға, ғылыми жобалар байқауларына қатысады. Өткен жылы Ақбота Жолбарыс өзінің ғылыми жобасында “Қымыздың қасиеті” тақырыбын зерттеп, аудан бойынша екінші орын алған болатын. Биыл “Мен тұратын үйдің тазалығы” деген тақырыпта зерттеу жүргізген оқушым Әмина Рақым республикалық “Зерде” зерттеу жұмыстары мен шығармашылық жобалар байқауының аудандық кезеңінде бірінші орын алып, облыстық турға қатысты. Ол осы тақырып бойынша екі жылдан бері зерттеу жүргізіп келеді, – дейді ұстаз.
Оның айтуынша, оқушылар жобаларға қатыса отырып, Интернетке шығуды, өздеріне қажетті материалдарды табуды, оны қорытып, нәтиже шығаруды үйренеді. Бірақ оқушылар мен ұстаздар бар қиындықты мектептің тарлығынан көріп отыр. Қазір бастауыш сынып оқушылары басқа ғимаратта оқып жүр.
Ләйла ЖАНЫСОВА,
“Солтүстік Қазақстан”.
Суретті түсірген Талғат ТӘНІБАЕВ.