Soltüstık Казахстан
Қаңтардың 8-9-ы күндері жалпы білім беретін пәндер бойынша өткен облыстық олимпиаданың қорытындысы шығарылып, кеше жеңімпаздар мен жүлдегерлер марапатталды. 15 пән бойынша білім додасына түскен 504 оқушының 206-сы жүлделі орындарға ие болды. Оның 95-і – үшінші, 71-і – екінші және 40-ы бірінші орындарды иеленді.
Ләйла ЖАНЫСОВА,
“Солтүстік Қазақстан”.
– Білім бәйгесінде әдеттегідей дарынды балаларға мамандандырылған білім ошақтары көш бастады. Олар: қазақ-түрік лицейі, Әбу Досмұхамбетов атындағы дарынды балаларға мамандандырылған облыстық гимназия-интернат, “Лорд” лицейі, “БЭСТ” гимназиясы, жалпы білім беретін Бірінші лицей, Бірінші гимназия. Сонымен қатар жүлделі орындардың 43-і ауылдық мектептердің оқушыларына тиесілі. Жыл сайын жүлдегерлер саны артып келе жатқаны қуантады. 2012 жылы 141 жүлделі орын болса, 2013 жылы – 183, 2014 жылы – 206-ға жетті. Жүлделі орындарға ие болғандарға I, II, III дәрежелі дипломдар, медальдар және сыйлық сертификаттары табысталады. Биылғы жылы “Проспект СК” газеті демеуші болды, олар Жамбыл, Аққайың аудандары мен жетім және ата-ана қамқорлығынсыз қалған облыстық мектеп-интернаттың жүлделі орын алған оқушыларына сыйлық береді, – дейді облыстық Білім басқармасы басшысының орынбасары Күлпаш Қалғожина.
Жеңімпаз және жүлделі орындарға ие болған оқушылардан қоғамдық-гуманитарлық және жаратылыстану-математика бағыттары бойынша екі команда құрылады. Олар наурыз айында жаратылыстану-математикалық бағыттағы пәндер бойынша – Өскеменде, қоғамдық-гуманитарлық бағыттағылар Шымкентте өтетін республикалық кезеңде облыс намысын қорғайтын болады. Бұл оқушылармен наурыз айына дейін қосымша дайындық жүргізілмек.
СУРЕТТЕ: қазақ тілі мен әдебиеті бойынша жеңімпаз Эльмира Сәдуақасова.
Суретті түсірген
Амангелді БЕКМҰРАТОВ.