Soltüstık Казахстан
Кеше “Нұр Отан” партиясының облыстық филиалының төрағасы, облыс әкімі Самат Ескендіров қоғамдық қабылдау өткізіп, 6 азаматтың мұң-мұқтажын тыңдады.
Арайлым БЕЙСЕНБАЕВА
“Солтүстік Қазақстан”.
1968-2012 жылдар аралығында облыс орталығындағы “Жас дарын” өнер мектебіне басшылық еткен Наталья Римская-Корсакова “Школа мечты” атты кітап жазған. Алдағы уақытта облысымыздағы саз мәдениетінің қалыптасу тарихынан сыр шертетін аталмыш еңбекті 300 дана етіп шығармақ. Осы орайда қаржылық қолдау сұрай келген ардагер ұстазға Самат Сапарбекұлы білім, мәдениет ведомстволарына тиісті тапсырма беріп, кітаптың жарық көруіне қолдау көрсету мәселесін шешетіндігін жеткізді. Ал Виктория Эрманбетова 5 айлық сәбиінің жағдайын айта келіпті. Туабіткен жүрек ақауымен күресіп жатқан Эреникаға тез арада ота жасау керек. Қазақстан мен Ресейдің дәрігерлері ота жасаудан бас тартқандықтан, мұндай қызметті Германия мамандары 40 мың еуроға көрсетуге әзір көрінеді. Алайда, жас отбасының мұндай қаржысы жоқ. Ал қазір нәресте тек дәрілердің көмегімен өмір сүруде. Сондай-ақ Виктория Эрманбетова жұбайы Ринаттың жетім екендігін айтып, баспана мәселесі қинап отырғандығын да жеткізді. Осы орайда Самат Ескендіров облыстық Денсаулық сақтау басқармасының басшылығына сол жерде тапсырма беріп, сәбидің өмірін сақтауға қатысты мәселелерді анықтауды тапсырды. Шолпан Мұқашева да 17 жастағы қызының аяғына Ресейде ота жасау қажет екендігін жеткізді. Әйтпесе, қыз бала өмірінің соңына дейін мүгедектер қоларбасына таңылуы мүмкін. Бұл мәселені шешу жолы қажетті медициналық сараптама нәтижелері бойынша қарастырылатын болады.
Өзге үш азамат көпқабатты тұрғын үйдің шатырын жөндеу және баспана алу мәселесін көтере келіпті. Олардың өтініштерін тыңдаған Самат Ескендіров тиісті ведомство басшыларына бұл мәселелерді жете қарастыруды тапсырды.
Қоғамдық қабылдаудан кейін “Нұр Отан” партиясының бірқатар мүшелеріне жаңа үлгідегі партиялық билет пен Алғыс хат тапсырылды.
Суретті түсірген Талғат ТӘНІБАЕВ