Soltüstık Казахстан
“Жас Отан” жастар қанатының облыстық филиалының белсенділері “Ардагерлерді ардақтайық!” республикалық жастар жобасы аясында аға буынға көмек көрсетуді жалғастыруда. Игі дәстүрге айналған шара барысында саяси ұйым белсенділері қала ардагерлері мен жалғызбасты зейнеткерлердің үйлеріне барды. Мақсат – қариялардың тұрмыс жағдайымен жақын танысып, аға буынға демеу көрсету.
Мұса ТАНАҚҰЛОВ,
“Жас Отан” жастар қанаты СҚФ атқарушы хатшысы.
Жалғызбасты қарт адамдарға су тасу, көмір және отын дайындау көп қиындық туғызады. Соған орай жасотандықтардың күшімен көмекке мұқтаж Ұлы Отан соғысының ардагері, запастағы лейтенант Василий Галат пен Котовский көшесіндегі №15 үйде тұратын 87 жастағы зейнеткер, педагогикалық еңбек ардагері Александра Бахмацкаяға көмек көрсетілді.
Ардагерлер жастарды қарсы алып, еңбек жолы мен соғыс жылдары жайлы әңгімеледі. Содан соң жастар қарттардың үй шаруасына көмектесіп, ауладағы қарды күреп, отын жаруға жәрдемдесті. Жасотандықтардың көмегіне дән риза болған қариялар ақ баталарын беріп, қайырымдылық шарасы алдағы уақытта да жалғасын тапса екен деген тілегін білдірді.
Аға ұрпаққа одан әрі көмек көрсету белсенді жастардың жоспарында бар. Бұл ойымызды жүзеге асыру үшін жергілікті бұқаралық ақпарат құралдарында байланыс телефондарын орналастырмақпыз. Сөйтіп, әрбір жалғызбасты аға ұрпақ өкілі өзіне қажетті көмек сұрау мүмкіндігіне ие болмақ.
Петропавл қаласы.