Soltüstık Казахстан
Жуырда Петропавл құрылыс-экономика колледжінің көрермендер залында біздің орталық жыл қорытындысын шығарды. Мерекелік шараға өңірдің дене шынықтыру пәнінің үздік мұғалімдері, спорт бойынша әдіскерлері мен БЖСМ директорлары қатысты.
Қанат СӘДУАҚАС,
өңірлік дене тәрбиесі, спорт және алғашқы әскери дайындық орталығының директоры.
Салтанатты шараның құрметті қонақтары: Солтүстік Қазақстан облысының Құрметті азаматы, КСРО-ның Құрметті спорт шебері Жамбыл Тасеменов пен биатлоннан КСРО-ның спорт шебері Константин Радченко қатысушыларды мерекемен құт-тықтады.
Орталық 2013 жылы республикалық деңгейдегі 5 спорт сайысын ұйымдастырған.
Әсіресе, мектеп және колледж оқушыларының VI республикалық қысқы спартакиадасының орны бөлек болды. Сайыс қорытындысы бойынша солтүстікқазақстандық құрама команда жеңімпаз атанды. Егер өңір спортшылары футзал мен президенттік көпсайыстан үздік болса, қысқы спорттық бағдарлау мен допты хоккейде – екінші, конькимен сырғанауда – төртінші, ал шаңғы жарысында бесінші орынды иеленді.
Облыс көлемінде өткізілген бұқаралық спорт шаралары аясында 125 жарыс ұйымдастырылып, оған 70 мыңнан астам адам қатысқан.
Шара барысында жыл қорытындысы бойыша үздіктер қатарынан көрінгендер марапатталды. Мысалы, қалалық Білім бөлімінің құрама командасы “Ақшақар – 2013” облыстық қысқы спартакиадасының жеңімпазы атанды. Ал Ғ.Мүсірепов атындағы аудан мен Аққайың ауданының Білім бөлімдері екінші және үшінші орындардан көрінді. “Жұлдызша – 2013” қысқы спартакиадасының қорытындысы бойынша Ғ.Мүсірепов атындағы ауданның Білім бөлімі жеңімпаз атанса, ал қалалық Білім бөлімінің командасы “Құлагер – 2013” жазғы спартакиадасында жеңіске жетті. Сондай-ақ 2013 жылдың айшықты сайыстарының бірі – “Жас сұңқар – 2013” облыстық спартакиадасының бас жүлдесі Петропавл аграрлық-техникалық колледжі құрама командасына бұйырды. Ал жеңістің бірінші сатысына көтерілген Солтүстік Қазақстан кәсіби-педагогикалық колледжінің студенттері “Сұңқар – 2013” облыстық спартакиадасының жеңімпазы атанды.
Сонымен қатар шара соңында жыл қорытындысы бойынша “Үздік ұстаз” аталымдарын жеңіп алған өңірдің бір топ мектеп және колледж мұғалімдері марапатқа ие болды.