Soltüstık Казахстан
Айымгүл МУСИНА,
Қожаберген жырау атындағы №6 орта мектептің аға жетекшісі.
Қожаберген жырау атындағы №6 орта мектептің 5 оқушысы жалпы білім беретін пәндер бойынша олимпиаданың облыстық кезеңінде жүлделі орындарға ие болып, білім ошағының, ата-аналары мен ұстаздарының мерейін үстем етті. Атап айтсақ, қазақ мектептеріндегі қазақ тілі мен әдебиеті пәндерінен 10-сынып оқушысы Эльмира Сәдуақасова – 1-орын, 11-сынып оқушысы Раушан Мұхамеджанова – 2-орын, 10-сынып оқушысы Мөлдір Хамитова – 3-орын, қазақ тілінде оқытатын мектептердегі орыс тілі пәнінен 9-сынып оқушысы Динара Қалықова – 1-орын, география пәнінен 10-сынып оқушысы Меруерт Байзақ 3-орынға ие болды. Сонымен қатар 10-сынып оқушысы Мақсат Елеукиннің математика пәні бойынша көрсеткен білім деңгейі де марапатқа ие болды. Мақсат облыстық Білім басқармасының Алғыс хатын алды.
Оқушыларымыз мұндай нәтижеге бір күнде жеткен жоқ. Білім ошағында “Олимпиадалық резерв” мектебі жұмыс істейді. Онда пән мұғалімдері әр сенбі сайын дарынды балалармен жұмыс жүргізеді. Бұл жеңіске оқушылар мен ұстаздар жылдар бойы талаптанып, ізденулерінің арқасында жетті. Облыстық олимпиадада жүлделі орындарға ие болған оқушыларымыз олимпиаданың республикалық кезеңінде бақ сынайтын болады.
Осы оқушыларға бағыт-бағдар беріп, білім нәрімен сусындатқан ұстаздары: Жібек Теңізова, Арайгүл Мұқанова, Олжас Жақыпов, Жадыра Сәдуақасованы және мектеп ұжымын атап өтпей болмайды. Жұдырықтай жұмылған ұжымның еңбегін тиісінше бағалаған “Өрлеу” БАҰО АҚ филиалы СҚО ПҚБАИ-ның директоры Алма Мырзалинова білім ошағына арнайы келіп, ұстаздар қауымына ризашылығын білдірді. Сондай-ақ мектебімізге сыйлық табыс етті.
Петропавл қаласы.