Soltüstık Казахстан
Петропавлдағы Бірінші гимназия базасында Білім саласындағы әдістемелік және ақпараттық технологиялар орталығы және Білім басқармасының ұйымдастыруымен республикалық “Сардар” кешенді олимпиадасының облыстық кезеңі өтті. Оған аудандық іріктеу кезеңдерінің жеңімпаздары мен қала мектептерінен барлығы 40 оқушы қатысты.
Ләйла ЖАНЫСОВА,
“Солтүстік Қазақстан”.
Республикалық “Сардар” кешенді олимпиадасын Қазақстан Республикасы Білім және ғылым министрлігінің “Дарын” республикалық ғылыми-практикалық орталығы Қазақстан Республикасы Қорғаныс министрлігінің Әскери білім және ғылым департаментімен бірлесіп, алғаш рет өткізіп отыр.
– Республикалық “Сардар” кешенді олимпиадасы жоғары әскери оқу орындарында білім алу үшін әскери қызметке қызығушылық танытатын дарынды балаларды анықтау, дамыту және оқыту, өскелең ұрпақты қазақстандық отансүйгіштік рухында тәрбиелеу мақсатында білім беру ұйымдарының 11-сынып оқушылары арасында өткізілуде. Алда тұрған сыннан сәтті өткендер Қазақстан, Ресей, Германия, Түркия, Қытай, Беларусь, тағы басқа да елдердегі жоғары әскери оқу орындарына түсуге жеңілдіктер алады. Бүгін Сіздердің араларыңыздан Қазақстан Республикасының қорғаушысы деген мәртебелі атаққа ие болатындар шығатынына сенім білдіремін, – деді Қорғаныс істері жөніндегі департамент басшысының әлеуметтік-психологиялық тәрбие жұмысы бойынша орынбасары, майор Амангелді Дүйсекин.
Білім басқармасының мектеп және мектепке дейінгі тәрбие мен білім беру бөлімінің бастығы Валентина Черныхтың айтуынша, “Сардар” олимпиадасының облыстық кезеңінің жүлдегерлері мен жеңімпаздарынан 3 адамнан тұратын команда құрылып, республикалық олимпиадаға қатысады. Онда жеңімпаз атанғандар еліміз бен ТМД елдерінің жоғары әскери оқу орындарында грантпен оқуға мүмкіндік алады.
– Сүйікті Отанымызды қорғап, оның тыныштығын күзету – еліміздің әрбір азаматының құрметті міндеті. Сонымен қатар қазіргі жас ұрпақтың Отан қорғауға ұмтылатындары бізді қуантады. Сіздердің әр тапсырмаға мұқият болуларыңызға, мектепте алған білімдеріңізді сарқа пайдаланып, өздеріңізді қай жағынан болсын жоғары деңгейде көрсетіп, лайықты баға алуларыңызға тілектеспін, – деді Валентина Анатольевна.
Облыстық олимпиаданың бірінші кезеңінде талапкерлер математика, физика, қазақ тілі, орыс тілі, бастапқы әскери дайындық және дене тәрбиесі пәндері бойынша кешендік тестілеуден өтті. 2-ші кезеңде алғашқы әскери даярлықтары мен дене шымырлықтары тәжірибе жүзінде сыналды.
Айыртау ауданындағы Саумалкөл қазақ орта мектебінен Азат Қайролла (суретте сол жақта) – 3 орын, Петропавл қаласындағы Әбу Досмұхамбетов атындағы облыстық дарынды балаларға мамандандырылған гимназия-интернаттан Бақыт Есләм суретте оң жақта) мен Нұркен Қалижан (суретте ортада) сәйкесінше 1-2-орындарға ие болды.
Облыстық додада алдарына жан салмай, суырылып шыққан жеңімпаздар мен жүлдегерлер 2014 жылы наурыз айында Астана қаласында өтетін республикалық кезеңге жолдама алды.
Суретті түсірген Амангелді БЕКМҰРАТОВ.