Soltüstık Казахстан
Ауа райының қолайсыздығына байланысты туындаған төтенше жағдай облыстың автожолдарында жүргізушілерге кедергі келтіруде: соңғы аптада облыс тас жолдарында 6 қар кептелісі оқиғасы орын алып, 50-ден астам жолаушысы бар 28 автокөлік қар құрсауынан құтқарылды.
Қалың қар облыстың төрт ауданында автокөліктер мен техниканың жүруіне бөгет болған. Мысалы, Тимирязев ауданындағы Ақсуат ауылына 6 шақырым қалғанда 18 жолаушысы бар 5 жеңіл автокөлік батып қалған. Дәл осындай оқиғалар Уәлиханов, Ақжар және Ғ.Мүсірепов атындағы аудандарда да орын алған. Барлық “темір тұлпарларды”, адамдарды қауіпсіз жерге көшіру үшін ТЖД-нің күштері мен құралдары, аймақтың жедел әрекет ету құрылымдары және ауыл әкімдіктері қажетті техниканы жұмылдырып, қар құрсауынан құтқарған.
Облыстық Төтенше жағдай жөніндегі департаменті жолаушыларды ауа райының өзгеруін бақылап, боран немесе аяз күндері сапарға шықпауға шақырады. Сақ болуға кеңес беріп, оқыс оқиға бола қалған жағдайда “112” телефонына қоңырау шалу қажет екендігін ескертеді.