Soltüstık Казахстан
Гүлбаршын САТЫБАЛДИНА.
Өткен аптада Көкалажар ауылдық округінде “Солтүстік – 2014” аудандық қысқы спартакиадасының алауы жағылды.
Спартакиаданың салтанатты ашылуында алаңда сап түзеген командалар жарысқа сақадай сай екендігін көрсетті. Ауылдағы спорт мерекесіне дайындық өте жоғары деңгейде болды. Мұз айдынының әрлендірілуі ерекше көзге түсті. Барлық алаң әдемі жалаушалар, гүл тізбектермен әшекейленіп, спартакиаданың отын жағуға арналған тостаған орнатылған.
Салтанатты кеш бүлдіршіндердің дайындаған тартымды билерінен басталды. Биден кейін жүргізушілер мерекенің ашылуын жария етті, содан соң командаларды қошеметпен қарсы алдық.
Салтанатты кеште аудан әкімінің орынбасары Қайрат Омаров құттықтау сөз сөйлеп, аудан басшысы атынан Көкалажар ауылдық округінің спортшыларына шаңғыларды сыйға тартты.
Осы үлкен мерекені ұйымдастырған демеушілер – “Тұқым” жауапкершілігі шектеулі серіктестігіне, “Гурень” шаруа қожалығына, Ақылбай Мусинге және Алма Моорға Алғыс хат табысталды.
Мереке ән, бимен жалғасты. Спартакиада алауын жағу салтанатты шараның ең шарықтау сәті болды. Мерекенің соңында таңғажайып отшашу көздің жауын алды.
Спартакиаданың алғашқы күні шаңғы жарысынан жекелей біріншілік тартысты өтті. Ерлер арасында 1-орынды – Руслан Жолдаспаев (Рузаев), 2-орынды – Александр Галайда (Рузаев), 3-орынды Мадияр Абдрахманов (Көкалажар) иеленді. Әйелдер арасында 1-орын – Валентина Мавроваға (Чистопол), 2-орын – Елена Дееваға (Рузаев), 3-орын Светлана Козловаға (Чистопол) бұйырды.
Шорт-тректен де жарыс бәсекелі болды. Бұл сайыстың қорытындысы келесідей: ерлер арасында 1-орынды – Алексей Быченко (Раисовка), 2-орынды – Максим Ноздрин (Андреевка), 3-орынды Қанат Құсайынов (Көкалажар) жеңіп алды. Әйелдер арасында 1-орынға – Надежда Сюськова (Андреевка), 2-орынға – Юлия Кремень (Андреевка), 3-орынға Айгүл Қайыржанова (Тахтаброд) ие болды.
Екінші күні ақтық сайыстар өтті. Хоккейден өткен финалдық ойында Новоишим-Червонный командаларының жалпы есебі 3:3 болғанымен, буллит (айып соққы саны) бойынша новоишимдіктер жеңіске жетті. Шорт-трек бойынша 1-орын – Шөптікөл, 2-орын – Нежинка, 3-орын Ломоносов округтерінің командаларына бұйырды. Шаңғы жарысында ерлер арасында 1-орын – Рузаев, 2-орын – Чистопол, 3-орын Көкалажар округтерінің командаларына берілді. Әйелдер арасында 1-орында – Чистопол, 2-орында – Рузаев, 3-орында – Шөптікөл округтерінің командалары. Жалпыкомандалық есеп бойынша 1-орынды – Чистопол, 2-орынды – Андреевка, 3-орынды Рузаев командалары алды.
Барлық жеңімпаздар естелік дипломдар және медальдармен марапатталды. Келесі жылы қысқы ойындар Бірлік ауылдық округінде өтеді.
Ғ.Мүсірепов атындағы аудан.