Soltüstık Казахстан
Ақпанның он екісінен он үшіне қараған түнде Шал ақын ауданындағы Кривощеково ауылында бір үй отқа оранып, оның иесі аман қалған еді.
61 жасар екінші топтағы мүгедек қарт зейнетақысын алып, бұл оның туған күніне дөп келгендіктен, осы қуанышын жеке өзі атап өтуді ұйғарады. Кешкілік арақ ішіп алып, темекі тұтатып, теледидар көріп жатып ұйықтап кетеді… Темекіден түскен шоқ отқа ұласып, есін ауруханада бір-ақ жиған. Оны аман алып қалған кім, ауруханаға қалай жетті – бұл жағы оған беймәлім.
Ал оны от құрсауынан Петропавл Әскери институтының 24 жасар курсанты Собир Базарбаев құтқарып алған еді.
Оқиға былай болған: Собир демалыста болған соң Кривощеководағы туыстарына келіп, түн ауа Сочидегі Олимпиаданы теледидардан тамашалап отырады. Осы уақытта туыстарының бірі көрші үйден от шығып жатқанын байқап қалып, дабыл қағады. Мұны құлағы шалысымен, Собир ойланып-толғанып тұрмастан, сыртқа жүгіріп шығып, отқа оранған үйге жетеді. Үйдің есігін жұлып ашып, ішке кіргенде қою да ащы түтін бетіне ұрады.
Ол өз басына қауіп төнгенін елеместен, үйде тірі жан бар ма екен деген оймен дауыс береді. Құлағына біреудің әлсіз ғана ыңырсыған үні естіледі. Көзге түрткісіз қараңғыда, қою түтінге шашала жүріп, дауыс шыққан тұсты шамалайды да еденге жата кетіп, жорғалап барып, дәлізден әрі жатын бөлмені шарлайды. Осы кезде еденде есінен танып жатқан адамды тауып алып, сыртқа көтеріп шығарады.
Тысқа шығысымен оған жедел жәрдем көрсетіп, өртсөндірушілер мен ауыл фельдшерін көмекке шақырады. Одан арғысы – біздің жоғарыда баяндағанымыздай.
Құтқарған жігіт те, аман қалған қарт та бұған дейін бірін-бірі білмепті. Собир Өзбекстанда туған. Жеті жылдан бері Қазақстан Республикасының азаматы. Әскери институттың төртінші курсында оқиды. Кривощеково ауылында әйелі, қайынжұрты және үш айлық ұлы тұрады.
СҚО ТЖД-нің баспасөз қызметі.