Soltüstık Казахстан
Құрметті солтүстікқазақстандықтар!
Ұлы да нұрлы мереке – Наурыз мейрамы құтты болсын!
Туып-өскен жердің өркендеуінің және тіршілік атаулының оянуының нышаны болып табылатын Шығыстың осы бір байырғы мерекесі жасампаздық пен сұлулықтың күш-қуатын бейнелейді, халқымыздың мәдениеті мен дәстүрлерінің айбындылығын айғақтайды.
Бүгінгі таңда Наурыз, этникалық және діни сипаттарына қарамастан, бүкіл қазақстандықтар тойлайтын шын мәніндегі жалпыұлттық салтанатқа айналып отыр.
Наурызды қарсы ала отырып, қоғамымыздың биік адамгершілік мұраттарына бет бұрамыз. Бұл күні бұрынғы өкпеназды кешіріп, айналадағыларға шаттық пен ізгілік дарыту дәстүрімізге енген.
Мемлекет басшысы – Елбасы Н.Ә.Назарбаев еліміздегі бірлікті, тұрақтылықты және татулықты қамтамасыз етуде Наурыз мейрамының ұлы мақсатын сан рет атап көрсетті.
“Қазақстан – бірегей ел. Біздің қоғамда әртүрлі мәдени элементтер бір-бірімен біріккен және бірін-бірі толықтырып тұрады, біріне-бірі нәр беріп тұрады”, – деп айрықша атап көрсетті ел Президенті ұзақмерзімдік “Қазақстан – 2050” Стратегиясында.
Міне, сондықтан да бүгінгі таңда этносаралық бірлік пен толеранттылықтың қазақстандық тәжірибесі әлемнің көптеген елдері үшін заңды түрде үлгі болып танылып отырғаны тектен-тек емес. Бұл бүкіл қазақстандықтардың еңбексүйгіштігі мен топтасқандығының нәтижесі екендігі сөзсіз.
Қымбатты жерлестер!
Наурыз ежелден бері жаңа жылдың басталуын, жаңару және адамдардың нұрлы келешекке үміт кезеңін бейнелейді. Ол алдымыздағы жаңа биіктер мен жетістіктерге жол ашады.
Республикамыздың тарихындағы бұл жыл Мемлекет басшысы бүкіл елдің алдына ілгерідегі ұзақ ондаған жылдарға арналған ауқымды әрі стратегиялық міндеттер қойған тағдырлы “Қазақстан – 2050” Стратегиясын жүзеге асыру басталғанын білдіреді.
Бізді елдің экономикалық дамуында тегеурінді ілгерілеушілікті жүзеге асыру, жаңа кәсіпорындар, энергетикалық қуаттар және жолдар салу, ең озық технологияларды өндіріске енгізу, агроөнеркәсіптік кешенде сапалы өсімге қол жеткізу күтіп тұр. Бүкіл елімізбен бірге біздің облысымыз да әрбір солтүстікқазақстандықтың күш-жігері жұмылдырылуы қажет жаңа да ауқымды міндеттерді шешуге кірісіп кетті.
Ұлы мереке – Наурыз мейрамының биік мұраттары тың табыстар мен жеңістерге қол жеткізу жолында бүкіл қазақстандықтардың бірлігі мен топтасқандығын нығайтуға тек қана игі ықпалын тигізе береді деп сенемін.
Қымбатты жерлестер! Сіздерді осы бір тамаша көктемгі мерекемен шын жүректен құттықтаймын! Әрбір солтүстікқазақстандық отбасыға, облыстың әрбір тұрғынына амандық-саулық, бақыт, бейбітшілік пен жақсылық тілеймін!
Самат ЕСКЕНДІРОВ,
Солтүстік Қазақстан облысының әкімі.