Soltüstık Казахстан
“Арман” бөбекжай-бақшасы
9-тобының ата-аналары.
“Арман” бөбекжай-бақшасында Наурыз мейрамына арналған шара өтті. Онда тәрбиешілер бүлдіршіндерді қазақ халқының салт-дәстүрлерімен таныстырды.
Ойынға негізделген мерекелік ертеңгілікке балалар зор қызығушылық танытты. Олар ойындарға белсене қатысып, тақпақтарын оқыды, би билеп, ән салды. Мерекеге арнайы дайындалған наурызкөжеден дәм татты. Киіз үйдің құрамдас бөліктерімен, олардың атауларымен де танысты.
Шараның мақсаты балғындарға Наурыз мейрамын кеңінен насихаттап, бүлдіршіндердің ұлттық салт-дәстүрге қызығушылығын оятуды және ұлттық құндылықтарды құрметтеуді, туған жерге деген сүйіспеншілікке үйретуді көздеген болатын. Осындай жан-жақты ойластырылып, үй жағдайында өткізілген мереке бүлдіршіндерді ұйымшылдыққа, бауырмалдыққа баулып, араларын одан әрі жақындастыра түсті.
Наурыз мейрамы құрметіне қолөнер бұйымдарының көрмесі де ұйымдастырылды. Онда негізінен макарон өнімдерінен жасалған кәдесыйлар болды. Балалар мен олардың ата-аналарының бірлесіп жасаған заттарынан қиялдарының ұшқырлығы ерекше байқалады. Көрмеге көктемнің келгенін паш ететін суреттерден бастап, әсемдігімен көз тартатын сандықшалар, жануарлар мүсіндері, ыдысаяқ жиынтықтары қойылды.
Наурыз мейрамы бізге көктем шуағымен бірге көтеріңкі көңіл-күй де сыйлады. Біз “Арман” бөбекжай-бақшасының педагогтеріне балаларымызды тәрбиелеудегі шығармашылық еңбектері үшін алғысымызды білдіреміз.
Петропавл қаласы.