Soltüstık Казахстан
Жыл басынан бері өңірімізде 199 өрт орын алды. Тілсіз жаудан келген шығын мөлшері 21 миллион теңгені құраған. Өрт 18 адамның өмірін жалмап кетті. Олардың 3-еуі – балалар. Күйгендердің 11-і әртүрлі деңгейдегі жарақат алды.
Петропавл қаласының Амангелді көшесінің бойындағы 4 қабатты тұрғын үйдің 3-інші қабатындағы баспалдақ алаңының электр қалқанынан өрт шықты. Тұрғындардың бірі – 72 жастағы зейнеткер түтіннің иісін сезіп, пәтерінен шығып, электр қалқанын тексермек болады. Құрылғының есігін аша бергенде оқшаулағыш тұтанып, жалын атылып, тұрғынның беті мен қолына тиген. Өрт электр сымдарын жалмап, подъезд түтінге толған. Пәтерлерден 6 адам шығарылған. Жапа шеккенге медициналық көмек көрсетілді. Ер адам ауруханаға жатудан бас тартты.
Электр сымының қысқа тұйықталуы салдарынан Қызылжар ауданының Новокаменка ауылының тұрғыны үйсіз қалды. Тұрғын үй түгелімен күл-қоқысқа айналды.
Аққайың ауданының Қаратомар ауылы тұрғынының үйінде теледидардың сымы тұйықталып, одан шыққан өрт үйдің мүлкін, еден мен терезелерді құртқан.
Облыс орталығының Крепостная көшесі бойында салынып жатқан жер үйдің маңында тұрған құрылыс вагоны өртке оранды. Анықталғандай, вагон ішіндегі пеш өрт қауіпсіздігі ережелерін сақталмай орнатылған. Пештің мұржасы терезе ойығынан шығарылып, ол жоғары температураның салдарынан өртенген.
Пештен шыққан өрт Петропавл қаласының Солнечный кентінде де орын алды. Кешқұрым коттеджден түтін шыққан. Белгілі болғандай, пеш дұрыс өңделмеген. Өртсөндірушілер тұтанған өртті жедел ауыздықтап, зардапты ықшамдады. Нәтижесінде 1 шаршы метр аумағында жылытқыш пеш мұржасының айналасындағы қабатаралық жабынға зақым келді.
Белгісіз тұлғалардың отты абайсыз қолданғандарының кесірінен Петропавл қаласындағы Демиденко көшесінде өрт орын алды. Соның салдарынан тұрғын үйдің дәлізі, шатыры, қабырғасы жанып кетті. 2 газ баллоны қауіпсіз жерге шығарылды.
Ғ. Мүсірепов атындағы ауданның Новоишимка ауылының белгісіз қаскөйлер түн ортасында 3 қабатты көппәтерлі тұрғын үйдің бірінші қабатында тұратын зейнеткердің кіреберіс есігін өртеген. Өртсөндірушілер 15 минуттың ішінде өртті ауыздықтап, үйден 10 тұрғынды сыртқа шығарған.
Болжам бойынша үш автокөліктегі өрт қозғалтқыш сымдарының қысқа тұйықталуынан болған. Қызылжар ауданында “Астана-Петропавл” тас жолының 20-шы километрінде “АUDI-80” автокөлігінен өрт шықты. Мотор бөлігі мен аспап панелі зақымданды.
Тайынша ауданының Келлеровка ауылында “Астана-Петропавл” автожолының маңында “Foton” автокөлігі өртке оранды.
Ал Ғ.Мүсірепов атындағы ауданның Нежинка ауылынан алыс емес орналасқан “Петропавл-Жезқазған” автожолында “КамАЗ-5511” автокөлігін де өрт жалмап, кабинасын құртқан.
СҚО ТЖД-нің баспасөз қызметі.