Soltüstık Казахстан
Өскемен қаласында математика-жаратылыстану бағытындағы пәндер бойынша оқушылардың республикалық олимпиадасы өтті. Бұл олимпиадаға Солтүстік Қазақстан облысынан 29 оқушы қатысып, 8 оқушы жүлделі II және III орындарға ие болды. Сонымен қатар 5 оқушы мақтау қағаздарын алды.
Олимпиада үш айналымда өтті. Оқушылар оның қорытындысын асыға күтті. Олимпиаданың қорытындысы бойынша Бірінші қалалық жалпы білім беретін лицейдің 9-сынып оқушылары Валерия Кревсун химия пәнінен – ІІ орын, Роман Корнилов – физика пәнінен және Вероника Близнецова математика пәнінен ІІІ орын алды.
Дарынды балаларға мамандандырылған қазақ-түрік лицейінің 10-сынып оқушысы Анар Суратаева биология пәнінен ІІ орынды иеленді.
Дарынды балаларға мамандандырылған “ЛОРД” мектеп-лицейінің 9-сынып оқушысы Максим Сухов – химия пәнінен және 11-сынып оқушысы Нұрсұлтан Исин – география пәнінен, сондай-ақ дарынды балаларға мамандандырылған “БЭСТ” гимназиясының 10-сынып оқушысы Нұржан Малденов пен 11-сынып оқушысы Александр Тартачев физика пәнінен ІІІ орынға ие болды.
Қалалық классикалық гимназияның 9-сынып оқушысы Диас Мұхамедқалиев – география, дарынды балаларға мамандандырылған қазақ-түрік лицейінің 11-сынып оқушылары Мадина Газизова, Саида Жүнісова, дарынды балаларға мамандандырылған “БЭСТ” гимназиясының 10-сынып оқушысы Дианэ Гатамова – биология, дарынды балаларға мамандандырылған “ЛОРД” мектеп-лицейінің 11-сынып оқушысы Кирилл Бородин физика пәндері бойынша грамотамен марапатталды.
Жүлделі орындарға ие болған оқушылар диплом, медальдармен және бағалы сыйлықтармен марапатталды.
Оқушыларға түрлі мәдени-танымдық шаралар ұйымдастырылды. Өскемен қаласындағы мұражайларға, облыстық А.С. Пушкин атындағы кітапханаға, С. Аманжолов атындағы ШҚМУ жанындағы ғылыми-білім беретін “Назарбаевтану” орталығына, қазақстандық “Азия-Авто” автомобиль құрастыру зауытына саяхатқа бардық.
Олимпиададан кейін балаларды демалдырып, сергіту үшін спорттық жарыстар, фестиваль, мерекелік концерттер, психологиялық тренингтер өткізілді. “Құрмет” орденінің иегері, ҚР еңбек сіңірген мұғалімі, академик Қ.Бітібаевамен кездесіп, оның зертханасында болдық.
Мейрам ӘБІЛЕВ,
Петропавл қаласындағы Бірінші қалалық жалпы білім беретін лицейдің мұғалімі, топ жетекшісі.