Soltüstık Казахстан
Біржан Шаймарданұлы – облыстық дарынды балаларға мамандандырылған қазақ-түрік мектеп-лицей-интернатының физика пәнінің бірінші санатты мұғалімі Павлодар мемлекеттік педагогикалық институтын физика пәні мұғалімі мамандығы бойынша және аталмыш институттың физика магистратурасын бітірген. Еңбек жолын өзі туып-өскен Павлодарда бастап, кейін Қостанай қаласында жалғастырған. Петропавл қаласына 2010 жылы ауысқан.
Біржан Шаймарданұлы да мамандық таңдаған кезде физика-математика пәндерінің мұғалімі болып еңбек ететін әке жолын қуған. 7 жылға толар-толмас ұстаздық өтілі бар жас маманның кәсіп таңдауда жаңылмағанына оның жетістіктері дәлел.
– Оқушыларым түрлі олимпиадалардан, ғылыми жобалардан жүлделі орындарға ие болып жүр. Әли Мүбәраков, Дархан Әбілов, Тимур Ибраев, Ернат Қантаев, Дина Құсайынова бірнеше рет облыстық олимпиадада – жүлделі орындарды иеленді. Дәурен Серкешев республикалық олимпиадада – алтын, Президенттік олимпиада мен Жәутіков атындағы халықаралық олимпиадада күміс медальдерді иеленді. Мәскеу қаласында өткен халықаралық ғылыми жобалар сайысының “Компьютерлік физика” аталымында Рауан Ескен – І, Әлішер Теміров – ІІ, Кипр мемлекетіндегі Паралимни қаласында өткен халықаралық ғылыми жобалар сайысында Зейнолла Фахридденов, Санжар Айнабек, Дархан Әбілов, Бахтияр Бегенов, Ғазірет Жетібай, Жәнібек Сыздықов ІІ орын иеленді. 2013-2014 жылы өткен республикалық ғылыми жобалар сайысында 11-сынып оқушысы Арман Қаратаев І орынды жеңіп алды, – дейді Біржан Шаймарданұлы.
Оқушыларының осындай жетістіктерге жетуіне байланысты ұстаз еңбегі де ескерусіз қалмаған. Біржан Шаймардан облыс әкімінің Алғыс хатымен, сыйақысымен және Білім басқармасының Алғыс хаттарымен марапатталған.
Ләйла ЖАНЫСОВА,
“Солтүстік Қазақстан”.
Суретті түсірген Талғат ТӘНІБАЕВ.