Soltüstık Казахстан
Облыстық Төтенше жағдайлар жөніндегі департаментте мемлекеттік өрт бақылаудың 2014 жылғы үздік қызметкері байқауы өтті.
Ербол ҚУАНЫШЕВ,
СҚО ТЖД мемлекеттік
өрт бақылау бөлімінің бас маманы.
Байқауға облыстық ТЖД-нің, аудандық және Петропавл қаласы ТЖБ-ның 20 өкілі қатысты. Барлық қызметкерлердің 3 жылдан кем емес өтілі бар. 2006 жылдан бері жыл сайын өтіп келе жатқан байқаудың бағдарламасына сала қызметкерлерінің іс-әрекетін реттейтін негізгі заңдар мен нормативтік-құқықтық актілер бойынша тестілеу енді. Екінші турда нысанның өртке қарсы жағдайына шартты түрде тексеру жүргізілді, оны аяқтағаннан кейін қатысушылар әкімшілік жаза қолдануға негіз болатын хаттама, қаулы толтырды.
СҚО ТЖД бастығының орынбасары, полковник Әсет Ысмағұлов төрағалық еткен байқау комиссиясы екі тур барысында байқауға қатысушылар жасаған материалдарды мұқият зерттеп, ведомство қызметкерлерінің жоғары кәсіби деңгейін атап айтты. Тестілеу және нысанды тексеру бойынша Аққайың ауданы ТЖ бөлімінің бас маманы, өртке қарсы қызмет майоры Дулат Шорманбаев 2014 жылдың үздік қызметкері деп танылды. Ол 2006 жылы ҚР ТЖМ-нің Көкшетау техникалық институтын аяқтаған соң, өрт сөндіру бөлімінде қарауыл бастығы, өрт сөндіру бөлімі бастығының орынбасары қызметттерін атқарды, соңғы жылдары мемлекеттік өрт бақылау саласында еңбек етіп жүр. Оған ауданның 147 нысаны бекітілген, оларды ол жоспарға сәйкес жыл сайын өте мұқият тексереді.
Облыстық жарыстың жеңімпазы сәуір айында Астанада Қазақстан Республикасы ТЖМ Өртке қарсы комитетінде өтетін екінші кезеңге қатысады.