Soltüstık Казахстан
Тайынша ауданындағы Келлеровка ауылының 45 жастағы тұрғыны ержүрек учаскелік полиция инспекторының көмегімен ажалдан қалды.
Келлеровка ауылдық полициясының кезекші бөліміне ауыл тұрғындары Больничная көшесі бойындағы үйлердің бірінен көк түтін шығып жатқанын және ішінен жабылған есікті ешкімнің ашпай отырғанын хабарлаған. Оқиға орнына жеткен полиция капитаны Нұрлыбек Жәмекенов есікті бірден бұзып, жанып жатқан пәтерге кірген. “Кейін түтінге толы үйдің ішінен есінен танып жатқан әйелді далаға алып шықтым”, – дейді Тайынша аудандық ішкі істер бөлімінің учаскелік полиция инспекторы Нұрлыбек Жәмекенов.
Осы кезде оқиға орнына өрт сөндіру қызметкерлері де келіп жетіп, үйден жанып жатқан көрпе мен матрасты далаға алып шықты. “Жедел жәрдем” үй иесін аудандық ауруханаға жеткізді. Науқас ауруханаға жеткізілген кезде, халі ауыр болғанымен, қазір жағдайы жаман емес. Кейін анықталғанындай, “Жедел жәрдемнің” көмегі ащы түтін жұтқан Нұрлыбек Жәмекеновтің өзіне де қажет болды.
“Мен пеш жаққаннан кейін денсаулығым нашарлап кетті. Есімді ауруханада жидым. Өрт сөндірушілер мені үйдің ішінен ауылымыздың учаскелік полиция инспекторы алып шыққандығын айтты. Оған алғысым шексіз”, – дейді Ирина Тривайлова.
Келлеровка ауылының тұрғындары Нұрлыбек Мақсұтұлының қызметіне дән риза. Себебі, Нұрлыбек адам өмірін алғаш рет сақтап қалып отырған жоқ. Осыдан 3 жыл бұрын өз-өзіне қол салмақ болған 40 жастағы ауыл тұрғынын да аман алып қалған болатын.
Нұрлыбек Жәмекенов жайында тек жақсы лебіздер ғана айта аламын. Оның учаскелік инспектор ретінде қызмет етіп келе жатқанына біраз болды. Жұмысына адал, бастаған ісін әрдайым соңына дейін жеткізе біледі, азаматтармен жақсы қарым-қатынас орната алады. Сондай-ақ, басшылықтың берген тапсырмаларын уақтылы орындайды”, – деп мінездеме берді Келлеровка ауылдық полиция бөлімінің бастығы, полиция подполковнигі Темірұлан Бәкіров.
Облыстық Ішкі істер департаментінің басшылығы Төтенше жағдайлар жөніндегі департамент басшылығына ержүрек полиция капитаны Н. Жәмекеновті марапаттау туралы ұсыным жолдады.
Ерлан МАХМЕТОВ,
СҚО ІІД баспасөз қызметінің инспекторы.