Soltüstık Казахстан
Облыстық спортқа дарынды балаларға мамандандырылған мектеп-интернатта Қаржы полициясының құрылғанына 20 жыл толуына орай волейболдан турнир өтті. Спорттық шарада Солтүстік-Шығыс аймақтан келген 4 құрама команда, 40-тан астам полицей сынға түсті.
Бәсекелі дода барысында алғашқылардың бірі болып павлодарлықтар мен солтүстікқазақстандық командалар алаңға шығып, жиналған қауымға қызу да тартысты ойын көрсетті. Ойын қорытындысы бойынша жерлес құрама павлодарлық әріптестерінен басым түсті. Келесі болып Қостанай мен Өскемен қалаларының командалары кездесті.
Бұл додада солтүстікқазақстандық қаржы полицейлері топ жарып, жеңімпаз атанды. Ал Шығыс Қазақстан мен Павлодар облысының құрама командалары екінші және үшінші орындарды иеленді.
Ойын барысында шеберліктерімен көзге түскен Андрей Иванов (СҚО) – “Үздік шабуылшы”, Қуаныш Байханов (ШҚО) – “Үздік байланыстырушы”, Игорь Серов (Қостанай) – “Үздік қорғаушы” және Сәкен Қосанов (Павлодар) “Үздік ойыншы” аталымдарында жеңіске жетті.
(Өз тілшімізден).
Суретті түсірген Талғат ТӘНІБАЕВ.