Soltüstık Казахстан
Өңіріміздегі кәсіптік-техникалық білім беретін оқыту орындарында “Мамандық. Еңбек. Болашақ” деген тақырыпта форум өтуде. Аталмыш шара Петропавл құрылыс-экономикалық колледжінде де өтті. Облыстық білім басқармасы ұйымдастырып отырған бұл форумның мақсаты жас жеткіншектерге кәсіптік-техникалық мамандықтар туралы ақпарат беру, ол мамандықтарға қоғамның оң көзқарасын қалыптастыру, сондай-ақ, экономикамызды еңбек ресурсымен толықтыру болып табылады. Оған жалпы білім беретін лицейлер мен гимназиялардың және мектептердің оқушылары шақырылуда.
– Біздің колледжде өткен форумға 29 білім ошағының оқушылары шақырылды. Мекемемізге оқушыларды тарту ісі – дәстүрлі шара. Биыл облыстық білім басқармасы оны форум түрінде ұйымдастырып отыр. Биыл әр колледждің жетістіктері мен артықшылықтары кеңірек көрсетілуде. Мұндай кездесу жас жеткіншектердің мамандық таңдауына үлкен септігін тигізеді деген сенімдеміз, – дейді колледж директорының тәрбие ісі жөніндегі орынбасары Алма Сәдуақасова.
Петропавл құрылыс-экономикалық колледжі төрт мамандық бойынша, дәлірек айтсақ, есепшілер мен экономистерді, заңгерлер мен технологтарды және құрылысшыларды даярлайды. Мемлекеттік тапсырыспен жұмыс істейтін мекемеде бүгінгі таңда 1093 адам кәсіби мамандықтарға баулынуда. Биыл тағы 250-ден аса талапкерге есігін айқара ашпақ.
Форумның шымылдығы колледж студенттерінің үгіт-насихат түрінде ұйымдастырған концерттік бағдарламасымен ашылды. Одан кейін колледждің әкімшілігі мен оқытушылары биылғы абитуриенттерді қабылдау жылында талапкерлердің қандай құжаттар өткізетіндігі, сынақ мерзімінің ұйымдастырылу тәсілдері мен кезеңдері, мамандықтардың еңбек нарығындағы сұранысы туралы ақпарат беріп, буклеттер таратты. Шараның екінші кезеңінде қонаққа келген 280 оқушы колледждің ішін аралап, оның материалдық базасымен танысты.
Гүлгүл ҚУАТҚЫЗЫ,
“Солтүстік Қазақстан”.