Soltüstık Казахстан
Квилинг және канзаши сөздерінің мағыналары облыстық ІІД мемлекеттік тіл және ақпарат бөлімінің жетекші маманы Гүлсәуле Қожакеноваға ертеден түсінікті. Ол өзінің бұл ермегімен әр адамға көтеріңкі көңіл-күй мен ерекше жылулықтың лебін сыйлайтынын жақсы біледі. Оның үйінде түрлі-түсті атласты ленталар, ландыштың сабақтары, пакеттегі әртүрлі бисерлер және қағаздың түр-түрі бар. “Шебердің қолы ортақ” демекші, Гүлсәуленің қолынан шыққан көркем де әсем заттар орхидея, ландыш сабақтары, атласты сәнді шашқа қыстыратын қыстырғыштар – оның епті де шебер қолдарынан шыққан туындылар. Осылардың бәрін ол туған-туыс, құрбылар мен әріптестеріне сыйға таратады. Бұл шеберлік Гүл-сәулеге Мамлют ауданы Бексейіт ауылының атақты шебері болған әжесі Уариғадан дарыған. Анасы Күнсұлу бүгінгі күні ұлттық төр көрпелер тігеді. Сегіз қыздың анасы қыздарына жасауды өз қолымен жасаған. Оның “пэчворк” стилінде тіккен көрпелері көз қызықтырады. Гүлсәуле осыдан үш жыл бұрын бисерден майда көк гүлдің көшірмесін жасамақ болып шешкен. Бұл туынды өзінің шынайылығымен ерекшеленгені соншалық, оның өз қолымен жасаған бірінші туындысын туысқандары сұрап алған көрінеді. Кезекті рет дүкен аралап жүргенде Гүлсәуле түрлі-түсті бисер тастарын сатып алып, ғаламтордан бұйымдарды жасау техникасымен жақынырақ танысқан. Үш кеш ішінде тоқылған себет ішіндегі ағаш та туыстарына сыйға тартылды. Одан соң тағы бір ұйқысыз түн ағаш көшірмесін жасауға жұмсалды. Тамаша өнер туындысын көрген әріптестері қатты таңғалды.
Шегі жоқ ғаламтордан өзінің кезекті туындысына шабыт іздеп отырғанда ол квилинг өнеріне тап болып, қатты қызығып кетті. Қағазды орау өнеріне ден қойған Гүлсәуле мұны да аз ғана уақыттың ішінде үйреніп алды. Осылайша, канзаши техникасын да меңгерген ол ғаламтор арқылы түрлі-түсті матадан шаш қыстырғыштар жасау жолымен танысты.
Гүлсәуленің күйеуі Жанайдар жарының өнеріне түсіністікпен қарап, оған ұдайы қолдау көрсетіп келеді.
Ерлан МАХМЕТОВ,
облыстық ІІД баспасөз қызметінің инспекторы.