Soltüstık Казахстан
Тимирязев ауданының орталығында жеке тұрғын үйлердің бірінде газ баллоны жарылды. Баллон клапанындағы редуктордың дұрыс орнатылмауы себебінен ауаға газ тараған. Үй иесі таңертең шәйнекті отқа қойған кезде редуктордың астынан от шыққан. Азамат баллон үстіне көрпе жауып, жалынды өз күшімен сөндіруге тырысқанымен, өрт өрши түсті. Жұбайымен бірге үйден жүгіріп шыққандарында газ баллоны жарылған. Жарылыс толқынымен баспананың асүйіндегі әйнектері мен кіре-беріс есік сынып, оттан үй жиһаздары мен тұрмыстық заттар зақымданды. Абырой болғанда, үй иелері жапа шеккен жоқ. Төтенше жағдай орнына жеткен құтқарушылар жалынмен бір сағаттай арпалысты.
Тілсіз жау басқа да солтүстікқазақстандықтардың үйлері мен қора-қопсыларында өзінің “қара ізін” қалдырды. Атап айтар болсақ, пешті салу барысында өрт қауіпсіздігінің сақталмауына жол берген Тайынша ауданының Белоярка ауылының тұрғынының баспанасы отқа оранды. Өрт аумағы 16 шаршы метрді құрады.
Электр сымдарының қысқа тұйықталуынан Мамлют ауданының орталығындағы тұрғын үйлердің бірінде өрт шықты. Оқыс оқиға үй иелері жоқ кезде орын алған. Будақтаған түтін мен қызыл жалынды байқаған көршілер өртті сөндіруге көмектеспек ниетпен келгенде есіктің құлыптаулы екенін көріп, кейін құтқарушыларды шақырған. От болса үй қаңқасының басым бөлігін зақымдап үлгерді. Тілсіз жаумен күрескен өртсөндірушілер бірнеше сағат өткен соң ғана өртті ауыздықтай алған. Белгілі болғанындай, асүйдегі электр плитасының электр сымдары қысқа тұйықталған. Құтқарушылардың айтуынша, ескірген электр сымдарының аппараттық сақтандырғыштары болмаған.
Облыс орталығының Букетов көшесі бойында орналасқан “Еуразиялық базар” аялдамасына тоқтаған №23 “Lishan” маркалы қоғамдық автокөлікте өрт шыққан. Анықталғанындай, көліктің мотор бөлігінде электр сымдары қысқа тұйықталған. Жолаушылардың ешқайсысы жапа шеккен жоқ. Тек автокөліктің моторы зақымданды.
Үстіміздегі жылдың басынан бері облыста 221 өрт болып, одан 23 миллион теңгеден астам материалдық шығын келді. Отта 18 адам қайғылы қазаға ұшырады, олардың үшеуі – бала. Он екі адам әртүрлі деңгейде дене жарақатын алды.
СҚО ТЖД-нің баспасөз қызметі.