Soltüstık Казахстан
“Облыстық “Жас ұлан” бірыңғай балалар мен жасөспірімдер ұйымы” қоғамдық бірлестігі мен облыстық еріктілер клубы “DAMU” кәсіпкерлікті дамыту қоры” өңірлік филиалында кездесіп, еріктілердің сындарлы сұхбат құру дағдысын дамыту бойынша тренинг-семинар ұйымдастырды.
Іс-шараның мақсаты – еріктілердің жұмысын жандандыру. Сындарлы сұхбат құру тақырыбында өткен тренингті психолог Александр Гакштетер жүргізді. Іс-шараға облыс орталығы колледждерінің студенттері қатысты.
Мүмкіндігі шектеулі жандардың, егде тартқан адамдар мен ата-ананың қамқорлығынсыз қалған балалардың арасында кездесулер, мерекелік концерттер ұйымдастырып, әрдайым көмек қолын созуға даяр еріктілер алдағы уақытқа жоспарланған іс-шаралармен танысты. Еріктілер клубының жетекшісі Елена Скакунованың айтуынша, Ұлы Жеңіс мерекесіне орай “Таза жеңіс”, “Жеңіс рекорды” акциялары өтіп, аталмыш іс-шара аясында ардагерлердің үйлеріне барып, ауланы, үйді жуып тазалауға көмектеспекші. Сонымен қатар, облыс орталығындағы ескерткіштерді де тазартпақшы.
Іс-шара соңында мемлекеттік жастар саясатын жүзеге асыруға қатысқан бір топ белсенді еріктілер марапатталды.
Бақытжан ЖОЛДАСҚЫЗЫ,
“Солтүстік Қазақстан”.