Soltüstık Казахстан
Петропавл Құрылыс-экономикалық колледжінде “Техникалық және кәсіптік білім студенттері – Мәңгілік Ел жастары” облыстық патриоттық форумы өтті. Шараға облыс орталығы колледждерінің студенттері қатысты.
– Елбасы Нұрсұлтан Назарбаев Қазақстан халқына кезекті Жолдауын арнап, мемлекетіміздің даму бағдарын белгіледі. Бірінші рет “Қазақстан – 2050” Стратегиясының даму жолы – “Мәңгілік Ел” ұлттық идеясы жарияланды. “Мәңгілік Ел” – экономикасы дамыған, білімді, мәдениетті, бірлігі жарасқан мемлекет. Ұлттық идея ең бірінші кезекте, құрметті жас жерлестер, Сіздерге арналған. Сондықтан да Елбасы “Мәңгілік Елді” қалыптастыру үшін жастардың көмегі мен қолдауы керек деп, болашақ иелеріне үлкен сенім артып отыр, – деген облыстық Білім басқармасы басшысының орынбасары Күлпәш Қалғожина студенттердің аталмыш шараға бір адамдай атсалысып отырғандығына ризашылығын білдірді.
Одан әрі сөз алған шара қонақтары өз ойларымен бөлісті. “Бастамашыл жастар орталығының” директоры Данияр Әбутәліп: “Біз, қазақ елінің жастары, білімді де алғыр болуымыз қажет. Ел ертеңі – жастардың қолында. Елбасы Қазақстан халқына Жолдауында атап өткендей, “Мәңгілік Ел” – бұл біздің жалпықазақстандық үйіміздің ұлттық идеясы, ата-бабамыздың арманы,” – деп атап өтіп, барша жастарды ұлтжанды және өз елінің абзал азаматы болуға шақырды.
Ал білім саласының ардагері Василий Карпук пен Құрылыс-экономикалық колледжінің жастар істері бойынша комитетінің төрайымы Әлия Тәшенова мақсатымыз тәуелсіздігімізді тұғырлы ету және елімізді дамыған 30 мемлекеттің қатарына қосу жолындау аянбай еңбектену екендігін атап айтты.
Аталмыш акция барысында өңір колледждерінің студенттері арнайы флешмоб ұйымдастырып, патриоттық әндер шырқады, өлеңдер оқыды.
Жастар шарасының соңында “Мәңгілік Елдің” тілек кітабына лебіздер жазылды. Бұл тілек кітабы облыстық “Жас ұлан” бірыңғай балалар мен жасөспірімдер ұйымының мүшелеріне табысталды.
Қанат АТАМАНОВ,
“Солтүстік Қазақстан”.
Суретті түсірген
Амангелді БЕКМҰРАТОВ