Soltüstık Казахстан
“Қызылжар” орталық мешітінде қала, аудан және ауыл имам-молдаларына арналған үш күндік оқыту-семинары өткізілді. Аталмыш шараға ҚМДБ-ның уағыз-насихат және ғаламтормен жұмыс бөлімінің меңгерушісі, теолог-исламтанушы, PhD докторы Ершат Оңғаров, ҚМДБ-ның мешіт істері жөніндегі меңгерушісі Ербол Сағиұлы қатысты.
Семинарда Ершат Ағыбайұлы “Жат ағымдардың түрлері” тақырыбында дәріс оқыды. Дәріс барысында имамдар тарапынан өңіріміздегі теріс ағымда жүрген азаматтарға байланысты толғандырып тұрған сұрақтарын қойып, маманнан толыққанды жауап алды.
Уағыз-насихат тобының жұмысы Петропавл қаласының гуманитарлық колледжінде жалғасты. Кездесуге ҚМДБ-ның мешіт істері жөніндегі меңгерушісі Ербол Сағиұлы қатысып, колледж студенттеріне теріс ағымдар жайында уағыз айтты. Ал Ершат Ағыбайұлы ұлтаралық, дінаралық келісім мәселелеріне тоқталды.
Семинардың екінші күні теолог-исламтанушы Ершат Ағыбайұлының “Әбу Ханифа мәзһабы және қазақ салт-дәстүрі” тақырыбында дайындаған дәрісін слайд арқылы көрсетумен басталды.
Ал ҚМДБ-ның мешіт істері жөніндегі меңгерушісі Ербол Сағиұлы имам-молдаларға ел заңнамасына сай мешіттерді тіркеу, қайта тіркеуден өткізудің тәртібі, жарғы, ереже, сенімхат жайлы түсіндірді.
Облыс әкімі Самат Ескендіров семинарға қатысушылармен кездесті. ҚМДБ өкілі Ербол Сағиұлы оған Ержан қажы Малғажыұлының сәлемін жеткізіп, бас мүфтидің берген тапсырмасының жүзеге асырылуының бірден-бір көрінісі ретінде осы өткізіліп жатқан семинарды атап өтіп, бұл игі шараның ұйымдастыруына ұйтқы болған облыс имамы Кенжетай қажы Байкемелұлына өз атынан ризашылығын білдірді.
Сондай-ақ, дінаралық, Ербол Сағиұлы өңіріміздегі түрік, тәжік, қырғыз, ауған диаспораларының өкілдерімен кездесті.
Семинарға қатысушылар Қазақстан халқы облыстық Ассамблеясының ХІХ сессиясына қатысты.
“Қызылжар” орталық мешітінің
баспасөз қызметі.