Soltüstık Казахстан
Петропавлдағы №9 мектепте шаһарымыздағы барлық білім беру ұйымдарында жасақталған командалардың қатысуымен “Балаға мейірімді қала” форумы өтті.
Мектептерден жиырмадан астам команда қатысқан жиында оқушылар қаланың жағдайына талдау жасай отырып, қоғамдағы өмірге өздерінің көзқарастарын білдірді. Оқушылардың қоғамдық бірлестіктері көшбасшыларының пікірінше, балалар әлеуметтік санаттарына, қабілеттеріне, дамуындағы ерекшеліктеріне қарамастан, өздері өмір сүріп отырған ортада сапалы қызмет түрлерін пайдалануға құқылы. Оқушылар командалары саламатты өмір салтын ұстану үшін аулалық клубтар, футбол алаңқайлары, мұз айдындары салынып, сыныптан тыс қосымша білім беру мекемелерінде тегін секциялар мен түрлі үйірмелер ашу қажеттігін тілге тиек етті.
Петропавл қаласында 100-ден астам балалар ұйымы мен бірлестігі бар. Олардың жұмысымен таныстыру үшін Мағжан Жұмабаев атындағы Петропавл гуманитарлық колледжінің үгіт-насихат тобы “Қызылжар қаласына саяхат” жасатса, “Дарын” мектеп-лицейіндегі “Жас ұландықтар” “Балаларға мейірімді қала” тақырыбында сөз алды. №2, №26, №21, №6, №23 орта мектептер де әр түрлі мәселелерді көтерді. Барлық мектептер оқушыларының шараға мұқият дайындалғандары көрінді. Олардың пікірлері күнделікті өздері көріп жүрген ортадағы мәселелерден туындаған тақырыптар болды. Сондай-ақ, олар қазақстандық қоғамның дамуына өз үлестерін қосып, оның отансүйгіштік, ынтымақтастық және өзара түсіністік сияқты басты құндылықтарын дамытуға жұмыла атсалысуға шақырды.
Форум қарсаңында облыстық Балалар құқығын қорғау жөніндегі басқарма мамандары суреттер, қолданбалы қолөнер бұйымдары мен “Менің қалам – мен үшін” шығармалар байқауын жариялаған болатын. Осы байқаулардың қорытындысы шығарылып, жеңімпаз оқушылар марапатталды.
Қатысушыларға облыстық Балалар мен жасөспірімдер шығармашылығы орталығы өнерпаздары концерт берді.
Елена МЕЗЕВА,
облыстық Балалар құқығын қорғау жөніндегі басқарманың бөлім басшысы.