Soltüstık Казахстан
Облыс энергетиктері қалалық Мәдениет және демалыс саябағындағы Ұлы Отан соғысы жылдарында қаза тапқан солтүстікқазақстандық жауынгерлер стеласына гүл шоқтарын қою акциясын ұйымдастырды, сол сияқты, “СевКазЭнерго” АҚ-ы тобындағы кәсіпорындардың бұрынғы еңбеккерлері – Ұлы Отан соғысы ардагерлерінің үйлерінде болды.
Қаза тапқан жауынгерлер ескерткішіне гүл қою салтанатына энергетика саласы кәсіпорындарының басшылары, облыстың жас энергетиктер қозғалысының өкілдері, сол сияқты, энергетиктер қамқорлыққа алған облыстық жетім балалар мектеп-интернатының “Жұлдыздар” отбасының тәрбиеленушілері және компанияның ардагерлері қатысты.
– Біз бұл күні өздерінің ерлігімен, жанқияр өжеттігімен ұрыс даласында еліміздің еркіндігі мен тәуелсіздігін қорғаған, Еуропаның көптеген халықтарын азат еткен ержүрек ерлерімізді құрметтейміз. Сол сияқты, Жеңіс күнін жақындату үшін аянбай еңбек еткен тыл еңбеккерлеріне тағзым етеміз. Олар біздің есімізде мәңгілік қалады, – деп атап өтті өз сөзінде Петропавл №2 ЖЭО-ның директоры Виктор Бармин.
Одан кейін энергетиктер өздерінің ардагерлері Татьяна Махованы, Александр Глазыринді, Павел Михайловты үйлеріне барып құттықтады. “СевКазЭнергосбыт” ЖШС-нің бас директоры Мағауия Сағындықов пен “СевКазЭнерго” АҚ-ның ұжым мүшелерімен жұмыс жөніндегі басқарма басшысы Светлана Овчинникова Татьяна Махованың үйінің табалдырығын құшақ толы гүл шоқтарымен және ардагерге арналған алғыс сөздерімен аттады.
“СевКазЭнерго” АҚ-ның жұртшылықпен байланыс жөніндегі бөлімі.