Soltüstık Казахстан
Бар саналы өмірін ел игілігіне, ауылының көркейіп, гүлденуіне жұмсайтын азаматтар баршылық. Солардың бірі – қоғамдық жұмыс десе жауапкершілігі мол жерлесіміз Нұртаза Сәкуов.
Уәлиханов ауданындағы Көбенсай ауылының тумасы Нұртаза Сәкуұлы Алматы халық шаруашылығы институтында экономист мамандығы бойынша білім алған. Ол өзінің еңбек жолын 1974 жылы Қызылту жөндеу-механикалық зауытында инженерліктен бастайды. Оның еңбек кітапшасында Амангелді ауылында құрылыс жөнінде шебер, кейін аталмыш кеңшарда бас экономист, “Амангелді” өндірістік ұжымының директоры, “Агроцентр” ЖШС-нің “Жігер” өндірістік учаскесінің директоры қызметтерін атқарған жылдар тізбектелген. Ал бүгінде ол Амангелді ауылдық округінің әкімі. Округ әкімі – лауазымы үлкен ауыртпалықты арқалататын, зор жауапкершілікті талап ететін қызмет. Бұл қызметті атқару үшін жұртқа сыйлы болу керек. Ал Нұртаза Сәкуұлының мінезі ел ағасы болуға жаралғандай. Ол ешқашан да лауазымын асыра пайдаланып, себепсіз дауыс көтеріп, біреуді басынған жан емес. Үнемі байыпты, байсалды мінезімен өз ортасында түсіністік табуға тырысады. Жұмысында өзіне де, өзгеге де талап қоя біледі. Оны қарамағындағылар “нағыз мәмілегер” деп құрметтейді. Әрине, сауатты, көзі ашық, білікті басшыға мұндай жауапты қызмет жеңіл түспесі анық. Мұндай жетекшілікке қанмен біткен ұйымдастырушылық қабілет керек.
Нұртаза Сәкуов отбасында да үлгілі әке. Зайыбы Алтын Жұмажанқызы екеуі бес бала тәрбиелеп, өсірді. “Ата көрген оқ жонар, шеше көрген тон пішер” демекші, зиялы отбасында өсіп-өнген балалардың барлығы өмірден өз орындарын тауып, ел игілігі үшін еңбек етуде. “Жақсыдан жақсы туса, теңі жоқ” деген сөз осындайда айтылса керек.
Нұртаза Сәкуұлы үстіміздегі жылғы 30 қазан күні зейнет жасына толады. Адам өмірінің осы бір белесіне абыроймен жеткен ағамыздың қуанышы ауылдастарының қызығы десек, асыра айтқандық емес. Ол сондай құрметке лайық жан!
Тоғжан ӘМРИНА,
журналист.
Уәлиханов ауданы.