Soltüstık Казахстан
Жуырда “Гастарбайтер” жедел-алдын алу іс-шарасы өтті. Тексеріс барысында көші-қон заңнамасын бұзудың 160 фактісі анықталды.
Облыстық полиция департаменті көші-қон қызметі басқармасының бастығы, полиция майоры Талғат Әбілевтің айтуынша, ел аумағына заңсыз енгендерді іздеу шарасы үш күнге созылды.
– Заң бұзушылықтардың басым бөлігі Қазақстан Республикасына келу, кету тәртібін бұзғандарға тиесілі. Шара аясында заң бұзған 9 шетелдік елдеріне қайтарылса, 70 адамның елімізде уақытша жүру мерзімі қысқартылды. Сондай-ақ, қоғамдық орындарда тәртіп бұзған екі шетелдік және сауда үйлерінің маңында бірнеше рет қайыршылықпен айналысқан 30 жастағы Өзбекстан азаматы әкімшілік жауапкершілікке тартылды, – деді Талғат Әбілев.
Іс-шараның қорытындысында қылмыс жасаудың 2 фактісі сотқа дейінгі тергеу амалдарының бірыңғай реестріне енгізілді. Сондай-ақ, көші-қон заңнамасын бұзған 11 жұмыс беруші әкімшілік жауапкершілікке тартылып, 191 адам есепке алынды. Ал қамауға алынған екі адам туралы мәліметтер анықталуда.
Нұрбек БАЕКИН, облыстық полиция департаменті баспасөз қызметінің бас маманы.