Soltüstık Казахстан
Біздің өңір Ресейдің үш облысымен шекаралас орналасқандықтан арада тығыз ынтымақтастық орнаған. Екі ел арасындағы қарым-қатынасты нығайту мақсатында қолға алынған мақсатты жұмыстардың қатарында өрттің алдын алу, төтенше жағдайлармен бірлесе күресу сияқты ортақ жобалар бар.
Бұған дейін екі тараптың азаматтық қорғаныс саласының қызметкерлері Ресейдің Түмен облысының аумағында екі мәрте кездесіп, өзара тәжірибе бөліскен болатын. Биыл да бұл игі дәстүр жалғасын тапты. Бұл жолы облыстық төтенше жағдайлар жөніндегі департаментінің бастығы, азаматтық қорғау полковнигі Рамиль Камалов бастаған топ шекара асып, омбылық әріптестерімен кездесті.
Тәжірибе алмасу мақсатында ұйымдастырылған шара барысында жерлестеріміз Ресейдің төтенше жағдай министрлігінің Омбы облысы бойынша бас басқармасының аэромобильдік тобы мен жылжымалы басқару қосынының мүмкіндіктерімен танысып, облыс орталығындағы мамандандырылған өрт-құтқару бөлімдердің өкілдерімен кездесті. Сондай-ақ, жұмыс тобының өкілдері дағдарыс жағдайларындағы басқару орталығының және бірыңғай кезекшілік-диспетчерлік қызметінің жұмысымен және жергілікті өрт сөндіру күзетінің тарихымен танысты.
Содан кейін жұмыс тобы қызметтік міндетін атқару барысында қаза тапқан Омбы облысы өрт сөндірушілерінің ескерткішіне гүл шоқтарын қойды.
Жұмыс сапары барысында “Трансшекаралық төтенше жағдайлардың алдын алу және оның зардаптарын жою” тақырыбында жиын өтті. Шара барысында трансшекаралық төтенше жағдайларды жою мәселелері бойынша өзара іс-қимыл жоспары бекітілді. Жоспарда төтенше жағдайлар мен табиғи апаттардың алдын алуға арналған кешенді шаралар қарастырылған. Трансшекаралық төтенше жағдай туындаған жағдайда оқиға орнына мүдделі министрліктер мен ведомстволардың өкілдері тартылатын болады.
Шара соңында қос тарап өзара іс-қимыл және ынтымақтастық туралы меморандумға қол қойды.
Болатжан АСҚАРБЕКОВ, облыстық төтенше жағдайлар жөніндегі департаменттің бөлім бастығы, азаматтық қорғау подполковнигі.